تالداڭىز قولفون فورماسىنا ءوتۋ | كومپيوتەر ءتۇرىن جالعاستى ارالاۋ

كورۋ: 486|جاۋاپ: 0

قوس بۇرشىك

[جالعانىمدى كوشىرۋ]

9

تاقىرىپ

11

دوس

753

ءنومىر

تەتە مۇشە

Rank: 4

جولدانعان ۋاقىتى 2015-5-21 09:51:15 |بارلىق قاباتتى كورسەتۋ
اق جاۋلىق
(اڭگىمە)
مەيرانبەك قالياسقار ۇلى
ۇرپاق دەسە ىشكەن اسىن جەرگە قوياتىن، وتباسىنىڭ باس قالقاسى بولعان وتاعاسىمەن جارىم عاسىرعا جۋىق ءومىردىڭ ىستىعىن مەن سۋىعىن بىرگە وتكىزىپ، بەرەكەنىڭ التىن قازىعى بولعان، سول انالىق اق پەيىلىنە وراي، جاراتقاندا جاسىنان جانىنا ىزگىلىكتىڭ ۇلتاندى ۇياسى ورناعان مەيىرجانعا وتباسىنىڭ ورتايماس باقىتى، ءۇمتىنىڭ ۇزىلمەس ارقانى بولعان ۇرپاقتان كەندە ەتكەن جوق. وتاعاسىنىڭ ورتا شارىق داۋلەتىنىڭ ارقاسىندا ۇيەلمەلى- سۇيەلمەلى ون بالانى ومىرگە اكەلىپ، بارىنە انالىق مەيىرىن توگىپ ەرجەتكىزدى.
«جاس كۇنىڭدە بەينەت، قارتايعاندا زەينەت بەر» دەپ تىلەيتىن اسىل انانىڭ ارمانى دا ورىندالىپ، ءتورت ۇلىن ۇيلەندىرىپ ويعا قوندىرسا، التى قىزىن قىرعا قوندىردى. ۇلدان نەمەرە، قىزدان جيەن ءسۇيىپ اباققا ارداقتى كەلىن، ۇرپاقتارىنا اسىل انا، نەمەرە، جيەندەرىنە اسىل اجە بولدى.
تار قۇرساعىن كەڭىتىپ، تاس ەمشەگىن يىتكەن سول ارداقتى انا ۇياباسار كەنجەنىڭ اسىلى، ال ءوزى وڭ كوزىنىڭ قاراشىعىنداي كورەتىن كەلىنىنە ومىردەن جيعان ونەگەسىمەن تاربيەسىن ءار كەز قۇلاعىنا قۇيىپ، بەرەكەنىڭ وڭاي قولعا كەلمەيتىنىن، ۇرشىقتىڭ سابىنداي قىسقا عۇمىردىڭ ەكى ايلانبايتىنىن، ادامدىق ار- نامسىتىڭ ارقاۋى- ادالدىق پەن شىنايى مەيىردە ەكەندىگىن ەمىس- ەمىس ەمەكستىپ وتىراتىن-دى.
ءيا، سىرتىلداعان ساعاتتىڭ تىقىرىمەن بىلىنبەي سىناپتاي سىرعىعان ومىردە ءبىر عۇمىرىن توگەپ بەرمەس ميحاناتى مەن قىزىعى الما كەزەك وسى وشارلى وتباسىنا ارناعان، كودەدەي كوپ بالانى اۋىزىنا تىستەگەندەي بولىپ ەرجەتكىزگەن انا قۇس- مەيىرجان سەكسەنىڭ ەكىسىنە كەلىپ، بالا- شاعاسىنا اۋىرتپالىق سالماي، مۇسىلمان قاۋىمى قاسيەتتى كۇن سانايتىن جۇما كۇنى تاڭەرتەگى ءشاي ۇستىندە، توسىننان مۇرتتاي ۇشتى دا، ۇلىمەن كەلىنگە «حوش» دەۋگەدە ءتىلى كەلمەي تەك كەميەگىن قاعىپ باقي ساپارىنا اتتانىپ كەتتى...
  زىمىراعان زامان كەرۋەنى سان قيلى جاڭالىقتار مەن قوسا، مىناۋ تۇگىن تارتساڭ مايى شىعاتىن ۇلىڭگىر وزەنىنىڭ بويىنا جاعالاي قونىستانعان وشارلى اۋىل ادامدارى  «اتاسىندا كورمەگەن» قايداعى ءبىر قاڭسىقتاردى دا قاتار الا كەلدى. دانا كوكىرەك ەنەنىڭ ءتالىماتىن تامىرىنا تەرەڭ سىڭىرە الماعان كەربەز كەلىن كونەنىڭ كوزى جوعالعان ءۇش جىلدان كەيىن، جەتەگىنە مۇرنى جۇمساق تايلاقتاي ەرەتىن ەلپەك كۇيەۋىنە مىنانداي وي تاستادى دا، بايگەگە قوسىلاتىن جاراۋ اتتاي ويقاستادى.
- مويىنندا مۇزداي تەمىر ارقان تۇرسادا مڭىق ەتپەيتىن ءموندىباسىم- اۋ، ەل بولىپ ەكى ەتەگى جەلپىلدەپ، ىرگەدەگى قالاعا اعىلىپ، قاباتتان ءۇي الىپ، باعالى تەمىردەن كولىك ءمىنىپ جاتقاندا، سەن نەسىنە وسى جارىماعىر اۋىلدان اۋكەڭ تۇسىپ ايىرىلماي قالدىڭ. ەلگە قوسقان بەس سادىراڭ مەن بەرەكەسى كەتكەن الاقانداي اتىزىڭىنان ەندى نە ءوندىرىپ الماقشسىڭ. وناندا، بالالاردىڭ وقۋىنا دا قولايلى قالا جاستانىپ، كاسىپ كوزىن اشپايمىزبا؟
  اقىرى ايلالى قاتىننىڭ ايتقانى ءۋاجىپ بولىپ، باسىنداعى پاناسىن ساتىپ، ەگىندىك جەرىن ءبىر تەلىمسەككە ون جىلعا مايعا بەرگەن ولار، اتاسىنىڭ باسى قالعان، اجەسىنىڭ جاسى تامعان اۋىلدان الىستاي بەردى.
«اقشالىعا بازار، اقشاسىزعا مازار» قالا تىرلىگى باستابىندا، جىلى شىرايمەن قارسى العانداي بولعانى مەن قالتاداعى اقشا تايازداعان سايىن سەميا تۇرمىسىنىڭ كەتەۋى كەتىپ، جوقشىلىقتىڭ وتكىر كەزدىگى وندىرشەكتەرىنە تاقالا ءتۇستى. جالعا العان ۇيلەرىنىڭ ماي اقىسىنىڭ سىرتىندا، ەكى كۇنىڭ بىرىندە كەلىپ قىدىڭداپ كەتەتىن قالىڭ الماننىڭ اشقاراق اۋىزى مەن قوسا، ءبارى ساتۋلى قالا تۇرمىسى بۇلاردى دىڭكەلەتىپ تىندى. قاراپ وتىرىپ اشتان ولەتىن ەمەس، قولىنان قوي باعىپ، ەگىن سالۋدان باسقا ەشتەمە كەلمەيتىن بولبىر كۇيەۋ اقىرى جاڭا سالىنعان قاباتتارعا قۇم، سەمونت تاسۋ جۇمسىنا شەگىلدى دە، كەلىنشەگى ءبىر بەزەنۋ بۇيىمدارىن ساتاتىن دۇكەنگە ۋاقتتىق جالدامالى جۇمىسكەر بولىپ ىستەدى.
جەردىڭ ءبىر قابات قىرتىسىن كوشىرىپ، اقبوز ءۇيدىڭ تۋرلىعىن جەلپىلدەتىپ، شاڭىراعىن ورتاسىنا تۇسىرەردەي بەت قاراتپايتىن اق بوران دا ەمەس، جاپىراقتى قوزعاپ، ءتۇتىندى شالقىتار باتستان سوققان جەلەمىك قىزمەتىنەن قايتىپ كەلە جاتقان ونىڭ باسىنداعى جاۋلىعىن ۇشىرا جونەلدى. الدە قايدا اسىعىس بارا جاتقان جۇك اۆتو كولىگى جول بەتىمەن بولىمىسىز سىرعىپ بارا جاتقان جاۋلىقتى اياماي باتپان دوڭعالاعىمەن باتتاپ ءوتتى...
«سىنقتان باسقانىڭ ءبارى» جۇعادى دەپ اتاڭ قازاق تەگىن ايتقان با ەدى. قالانىڭ مادەنيەتىنە ىلەسەمىن دەپ ەلىرگەن كەلىنشەكتىڭ بار تاپقانى وزىنەن اسپادى. سول باسىنان جاۋلىق كەتكەن كۇنىنەن باستاپ، ول ءبىر ەركىندىك الەمىنە قادام قويعانداي، باسىنداعى تەمىر قىرساۋى الىنعان سۇن كۇڭ سياقتى ءبىر عاجايىپ كۇي كەشتى. سودان باستاپ قىرىپ تاستاپ قاس شەكتىرۋ، ءتۇرلى ۇلگىلدە ءشاش بۇيرالاتۋ سىندى جاڭا جاسانۋ ۇلگىلەرىن قابىلداي باستادى. بۇرىنعى اۋىلدا بالتىرىن جاۋىپ تۇراتىن قوس ەتەك كويلەك قىسقارىپ قارا سانعا كەلىپ، كەۋدە تۇسىنىڭ قوس انارىنان جوعارى جاعى جالاڭاشتالدى. كەشتەتىپ تاڭساعا، قاباقحاناعادا بارۋى جيىلەي ءتۇستى.
باستان جاۋلىق كەتكەن سوڭ، ساۋلىقتا ودان الىستاي بەردى. ارەدىك باسى اينالىپ، كوزى قاراۋىتاتىن، توبە قۇيقاسى ءبىز سۇعىپ العانداي شانىشقاقتاپ اۋىراتىندى تاپتى. ارەدىك ۇيىنە كەلگەندە باسىنىڭ اۋىرعانىنا بولا جاۋلىق بايلاعان وعان بالالارى توسىرقاي قاراپ:
- شەشە، بىرەۋ قايتىس بولدى ما؟ تاعى ولىمگە باراسىز با؟- دەپ قورقىنشتى سۇراۋلاردى باستىرمالاتا جونەلەتىن. ءبىرى باليعات جاسىنا تولماعان سول ەكى بالاسىنىڭ ايتقانى كەلىپ، ول وسى وڭىردە ادام ەستىپ، كوز كورمەگەن «ولىمگە» باردى.
جۇگەنسىز جۇرىس پەن جىمسقى جىرتىڭ ونى مىناۋ اق نەكەلى جولداسىنان، شارانادان شايقاعان باۋىر ەتى بالالارى مەن مايعا العان بولسادا مازداپ جانعان وتى بار ولەڭ توسەگىنەن جەرىتە باستادى. كەزەگەن اياعىمەن كەردەڭ باسقان كوكەك تاقىلەس ەكى اياقتى كەرىمسال ءدىنى باسقا، ءيتى قارا قاسقا ءبىر اقشالى قوجايىننىڭ ۇياسىنا بارىپ جۇمىرتقالادى. بۇكىل ەل بولىپ مىنا سۇمدىققا جاعالارىن ۇستاپ، يمانىن ۇيىردى...
شويىنداي اۋىرلاعان باسىن شەڭبەكتەي قۇلاعان ول ءدارىسىن ءىشىپ توسەگىنە جانتايىپ جاتىپ مىزعاپ كەتتى. تۇسىنە ۇيىنەن بەزىپ شىققان كۇنگى ۋاقيعالار ەكرانداي تىزبەكتەلدى. بوتاداي بوزداعان ەكى بالاسىنىڭ اشتى داۋىسى ەستىلدى. كەنەت شىلاۋىشى اپپاق، وڭى سىنق ەنەسى مەيىرجان پايدا بولا كەتتى. دەگدار انا الدە نەگە وكپەلى سياقتى ءتۇسى تىم سۋىق. كەلىننە جاقىنداي كەلىپ شورت بۇرىلدى دا نەمەرەلەرىنە قاراي اياڭدادى. ونى ءتىپتى ادام دەپ ەلەپ تە قوياتىن ەمەس. سۇستى انا كەلىپ شاپالاقپەن بەتىمنىڭ وتىن شىعارارما ەكەن دەپ ويلاعان ونىڭ ويى تەرىس كەتتى. بالكىم، قولىن ارامداعىسى كەلمەگەن شىعار. كەنەت گۋىلدەگەن جويقىن ءۇن شىعارىپ ۇيتقىپ كەلگەن قۇتىرىق قۇيىن بەيعام تۇرعان ونى ءىلىپ الا جونەلدى. قارا قۇيىننىڭ ىشىندە قالباقتاپ باسى تومەن سالبىراپ، ءوتى اۋزىنا قۇيىلارداي بولعان ونىڭ زارەسى ءزار تۇبىنە كەتىپ تومەنگە قارادى. ەكى نەمەرەسىن تاس قىپ قۇشاقتاعان ەسىل ەنەسىن كوردى. كەنەت  اق شىلاۋىشتى اجە  اق قاناتتى قۇسقا اينالىپ، ەكى جەتىمەكتى قاناتىنا قوندىرىپ كوز ۇشىنداعى اقشا بۇلتتارعا ءسىڭىپ كەتكەندەي بولدى.
ەي، تەبىنگىسىنەن تەر كەتپەگەن تۇرىكتىڭ تۇقىمى، انالاردىڭ اق سۇتىمەن اۋىزدانعان بۇگىنگى كۇننىڭءزاۋزاتتارى ، سەندەردى توزعىندى كۇننىڭ توپالاڭىنان ساقتاسىن، شەرلى كۇندە شەمەندە بولسادا، اپپاق ارىن اق شىلاۋشىنا وراپ تازا ۇستاعان انالارىمىزدىڭ اق جاۋلىعىنىڭ قاسيەتى اتپاسىن!
بەس يۋان
(اڭگىمە)

   تۋىلعان كۇنى بولىپ، ءبىر ۇستەل ءبىر- ءبىر ءۇيدىڭ ەركە توتايلارى بالكۇلشە جەپ مارە- سارە بولىپ جاتقاندا، قۋانشىنا قۇتتى بولسىن ايتىپ، ۇلىمنىڭ الدىندا «اكەم شىق بەرمەس» دەگىزبەيىن دەپ بەس يۋان ۇستاتتىم. مەنىڭ قيمىل- قىبىرىمدى قالت جىبەرمەي باعىپ تۇرعان سەميامىنىڭ ايەل پاتشا ايىمى، بۇل «كوپەستىگىمدى» جاقاتپاعانداي كۇڭك ەتتى.
- تەگىنەن قازانىنا قاق تۇرماعان كەدەيلىگىڭ مەن تامىرىڭىنان تارتىپ كوكتەگەن تاقىستىعىڭ ءبىر قالمادى- اۋ، قۋ قايىرشى، انداعى كورشىلەردىڭ بالالارىنان ۇيالساڭشى،- دەپ سالدى. كەزەپ تۇرىپ اتىلعان كەسەلدى قاتىننىڭ كەكەسىنى جۇرەگىمە قانجارداي قادالىپ، اشۋدان اۋىزىما كەلگەن بىلاپىت بوقتىقتى بۇركىپ جىبەرۋگە از قالىپ ءوزىمدى ارەڭ تەجەدىم. وڭكەي كوك ءورىم بالعىنداردىڭ الدىندا اۋىزىمدى ارامداۋدى ابەس سانادىم دا  كوڭىل كوكجيەگىنىڭ كوز ۇشىندا جاتقان، جۇرەك تۇكپىرىمنىڭ قويناۋىنا تەرەڭ جاسىرىنعان، ەندىگى ءومىرىمنىڭ قاز مويىن قازىعىنا بويتۇمارداي بايلانعان وتكىنشى ءومىردىڭ بەتتەرى پاراقتالا باستادى....
  باستىڭ دىمىن بىلاي قويعاندا، اۋىزىمىنان انا ءسۇتى كەپپەگەن بالا كەزىمدە، اۋىلىمىزدا ۇلكەن ءبىر قوزعالاڭ بولىپ (ارتىنان بىلدىك مەملەكەت بويىنشا جۇرىلگەندىگىن)ۇرلىق قىلعان، باسقىنشىلىق جاساعان، توناۋشىلىق ىستەگەن سوتاناق- سودىر بىتكەندى قيداي سىپىرعان كەز ەدى. سول قاتاردا كورشىمىزدىڭ جىيرمادان اسقان سوقتالداي ۇلى دا كەتتى. ەستۋىمىزشە بىرەۋدەن تارتىپ العان بەس يۋان باسىنا شوقپار بولىپ ءتيپتى دە، ون جىلدىق باس بوستاندىعىنان ايىرىلىپ تىنىپتى. سول شاقتا مەنىڭ ءسابي سانامدا ءبىر ادامىنىڭ جالىنداعان جاستىق عۇمىرىن جالماعان بەس يۋان تىم-تىم قوماقتى دۇنيەدەي سەزىلەتىن.
كەيىن جاقسى مەن جاماندى، وڭ مەن سولدى بىرتىندەپ پارىقتاي باستاعان، دەسەدە كەلەر- كەتەردى كوپ ەسكەرىپ كەتپەيتىن باستاۋىشتىڭ سوڭعى جىلىندا، اۋىلدىق ۇكىمەتتەن وقۋدان تاراعاندا الا كەلۋدى تاپسىرعان اكەمنىڭ 128 يۋان ايلىعىنىڭ 5 يۋانىنان ءوز بەتىممەن ۇستاپ، ەكى باقايىم شىعىپ جۇرەتىن اعامنىڭ ەسكى شاقايىن تاستاپ، سۋداي جاڭا ءبىر پار سارى شاقاي الىپ، ساتۋشى حانزۋ بيكەشتەن قورىنا تۇرىپ، جۇلىعى شىعىپ، جۇرناعى قالعان كونە كومپسىمدى شەشىپ، ءبىر ءتۇرلى جاعىمدى ءيىسى بار جاڭا شاقايدى كيىپ شاتتانعانىم ەسىمدە. دەسەدە مەنىڭ قۋانشىم ۇزاققا بارمادى. ۇيگە بارعان سوڭ، اكەم مەن شەشەمىنەن ۇلكەن سوگىس ەستىدىم.
- ءوزىڭ ءبىلىپ اقشا ۇستاۋدى قايدان ۇيىرەندىڭ جەكسۇرىن، شاقايىم توزدى دەپ شەشەڭە ايتساڭدا الىپ بەرەتىن ەدى عوي،- دەپ ەكى كوزىن ماعان قاداپ ىزبارلانا سويلەدى اكەم. مەن اكەمنىڭ كوزىنە تۇزۋ قاراي الماي، جاڭا عانا ساتىپ العان، اياعىما شاق كەلگەن شاقايىمنىڭ باسىنا قاراپ كبىرتىكتەدىم.
- جاسىنا جەتپەي جامان ادەتتى قايدان جۇقتىردى ەكەن دەشى، بۇل جەلكەڭ قيلىعىر،- دەدى شەشەمدە مىنا جاقتان ءۇنى جارقىشاقتانا شىعىپ. مىنە مەن سول كۇنىنەن باستاپ، ءوزىم ءبىلىپ اقشا ۇستاماۋعا ىشتەي قاسام ءىشتىم. اسىرەسە قالتاما بەس يۋان تۇسە قالسا سول ءبىر ۋاقيعالار كوز الدىما تىزبەكتەلىپ كەلەتىن دە، الگى بەس يۋاننىڭ قادىرى تىپتەن ارتا تۇسەتىن. سۇيتە ءجۇرىپ ءومىر ماعان «تارتا جەپ تاي، قورقا جەپ قوي» قالدىرۋدى ۇيرەتە باستادى.
     ءتىپتى سوقتالداي ازامات اتانىپ، ارمان قۋىپ ۇلكەن قالادا سىتۋدەنت بولىپ جۇرگەن شاعىمدا دا سول بەس يۋان تاعى ءبىر رەت كولدەنەڭدەپ الدىمنان شىقتى. ىرگەلەس كلاستا وقيتىن، ىشەك- قارىنىمىزعا دەيىن ارالاسىپ كەتپەسەكتە، امانىمىز تۇزۋ، ءازىلىمىز جاراسقان بايان اتتى تارباعاتايلىق مەكتەپتەسىم بولدى. ءبىر جەكسەنبى كۇنى سول قاقپان بەل، قارا تورى قىز مەنى جاتاعىما ىزدەپ كەلىپ، باسقا ءبىر مەكتەپتەگى ساباقتاسىنا ەرتىپ بارۋدى ءوتىندى. ادەتتە سىرتىنان عانا تامسانىپ، ىشتەي ىڭكار بولىپ جۇرەتىن ەلىكتىڭ لاعىنداي ەركە قىز الدىڭا كەلىپ قيلىپ تۇرعاندا، قالايشا ەلپەكتىك ەتپەسكە.قۇداي وڭداعاندا، باراتىن مەكتەبى جاقىن ماڭدا بولعاندىقتان كوشە اۆتوبوزىنا تۇسىپتە اۋىرە بولمايدى ەكەنبىز.
مىنە ەكەۋىمىزجولعادا شىقتىق. ول تىم ۇياڭ، از ءسوزدى قىز. ال مەن بولسام وسى مەكتەپكە از دەگەندە ءۇش- ءتورت رەت كەلگەنىمدى ايتىپ، جىرتىق- تەسىگىنە دەيىن بىلەتىندىگىمدى وعان ماقتان ەتىپ ايتىپ كەلەمىن. مەكتەپكە جەتكەن سوڭ، ول قىزدار جاتاعىنا كىرىپ ساباقتاسىنا جولعۋعا كەتتى دە، ماعان مەكتەپ قاقپاسىنىڭ الدىنان توسۋدى ايتتى.مولشەرمەن جارىم ساعاتقا جەتپەيتىن ۋاقىتتا ولار مەكتەپ قاقپاسىنان شىقتى.ول مەنى كورگەن سوڭ، قاسىنداعى ساباقتاسىنا الدە بىردەمەلەردى ايتىپ قوشتاستى دا، ماعان قاراي اياڭدادى. ءبىز تاعى كەلگەن جولىمىزبەن كەرى قايتىپ، مەكتەبىمىزگە قاراي بەت تۇزەدىك.
مەكتەپكە تاياعاندا، ول ماعان ءبىر ءتۇرلى قىسلا:
-ۇيات بولدى، ساباقتاسىمدى اۋرەلەگىم كەلمەدى، ايتپەسە تاماق ءىشىپ كەتىڭدەر دەپ كوپ جابىستى، مەكتەپكە كەلدىك عوي. بىرگە تاماق ىشەيىك، مەن قوناق قىلايىن،- دەدى ماعان كۇلە قاراپ.
   ايتارعا بولماسا قسىلىپ قالدىم. قالتامداعى بار ءۇش يۋان اقشاعا ءبىر «قارعالداق ماركالى» تەمەكى الىپ، ءبىر بالمۇزداق جەپ تاستاعانىمىن ونى قاقپا الدىنان كۇتكەن شاعىمدا. دەسەدە، جۇرەگى سۇلۋ، يناباتتى قىز مەنى الدى- ارتىما قاراتقان جوق، تارتىنعانىما قاراماي اسحاناعا سۇيرەلەدى. سونىمەن <قارىن تويدىرارلىق تاماق ىشەيىك> دەگەن ونىڭ ىستق ىقىلاسىن تويتارىپ، مەنىڭ ۇيعارۋىم بويىنشا ءبىر- ءبىر كەسە «سير ەتى كەسپەسىن» ىشەتىن بولىپ كەلستىك.
قىزىقتىڭ ۇلكەنى اسحاناعا كىرگەنىنەن كەيىن بولدى. ءبىز كىرگەن اسحانانىڭ ءبىر ۇستەلىندە مەنىمەن ءبىر جاتاقتا جاتاتىن بارلىق ۇيعىر ساباقتاستارىم وتىر ەكەن.مەن ولارعا ءبىر ۇرلىق ىستەگەن ادامداي قىمتىرىلا باسىمدى ءيىپ، بايان بارىپ جايعاسقان ۇستەلدىڭ ءبىر شەتىنە ولارعا سىرتىمدى بەرىپ وتىرا كەتتىم. اڭگىمە تاماق ءىشىلىپ، اقشا تولەيتىن كەزدە بولدى. جاتاقتاستارىمنىڭ كوزىنشە قىز بالاعا تاماق اقشاسىن تولەتۋدى ەرسى ساناعان مەن اقىرى ءبىر باتىلدىققا باسىپ:
-بايان ۇستەل استىنان بىلدىرمەي بەس يۋاندى ماعان بەرشى، ولاردىڭ الدىندا ساعان اقشا تولەتسەم ۇيات سياقتى،- دەدىم سىبىرعا جاقىن ۇنىمەن. بۇل شاقتا جونىمىنان تەر شىعىپ، ەكى بەتىم ۇياتتان ورتەنىپ بولعان ەدى. ول ماعان قاراپ رياسىز جىميىپ كۇلدى دە، بەس يۋاندى ۇستەل استىنان مەنىڭ قولىما سالدى. بەس يۋان قولىما تۇسكەن مەن باستاپقىداي ەمەس، اتقالاقتاعان جۇرەگىم ورنىنا ءتۇسىپ، تىنىسىم كەڭىپ سالا بەردى. كوپ كىدىرمەي قوجايىنعا ەكى كەسە «سير ەتى كەسپەسىنىڭ» اقىسى بەس يۋاندى ۇستاتىپ، الگى جاتاقتاستارىما «اس بولسىن» ايتىپ، باياندى ەرتىپ اسحانادان شىقتىم.
      كەشىندە جاتاقتاستارىم مەنى سان- ساققا جۇگىرتتى."تىمپيىپ ءجۇرىپ، كەسەلىڭ ىشىڭدە ەكەن. قاي كەزدە قولىڭا قوندىرىپ العانسىڭ "دەپ بۋىنسىز جەردەن پىشاق سالىپ، قالجىڭنىڭ كورىگىن قىزدىرا ءتۇستى. مەن ولارعا بارلىق جاعدايدى ايتىپ، اقتالسام دا، ءبىراق بەس يۋاندى باياننىڭ وزىنەن الىپ ونى قوناق قىلعانداي بولعان ۇياتتى قىلىعىمدى جاسىرىپ قالدىم. ودان بەرى دە اتتاي جەلىپ ون سەگىز جىل وتە شىعىپتى. مەندە قىزمەتكە شىعىپ، ۇيلەنىپ،  بۇل كۇندەرى جىگىت اعاسى جاسقا كەلىپپىن.
ءومىرىنىڭ ۇلتاندى بولەگى اۋىلدا وتكەن، جوقشىلىق جومارت قولىن كوپ بايلاعان، دالانىڭ سۇرتورعايى سياقتى ەركەكتى تاسادا تۇرىپ ارباپ تۇسىرگەن  اق جىلانداي قالانىڭ كەربەزى، باسىنداعى بازارلى جاستىق دەيتىن بايىلعىنان تارتىپ، بەرىسى قالتاسىنداعى ايىلعىنا دەيىن قىرىق قۇبىلىپ قولىنا تۇسىرگەن، ۇرپاعىم جاسىنان اقشا قۇمار ازىندى بولماسىنشى دەگەن بولماشى اكە تىلەگىن، كوڭىلىندەگى بەس يۋاننىڭ ءزاۋ بيىكتەگى ورنىن، قادىرى قاشىپ، قارىنى اشىپ كورمەگەن قاتىن قايدان ءبىلسىن!
بۋرىلتوعاي اۋدانى قۇرىلىس سولتۇستىك جولى تۇرعىندار كوميتەتى

ءسىز تىركەلگەننەن كەيىن جاۋاپ جازا الاسىز تىركەلۋ | تىزىمدەلىڭىز


Archiver|قولفون نۇسقاسى|新疆作家哈文网
Powered by Discuz! X2.5(NurQut Team)© 2001-2011 Comsenz Inc. For www.xjzjxh.com
جوعارى جاق