تالداڭىز قولفون فورماسىنا ءوتۋ | كومپيوتەر ءتۇرىن جالعاستى ارالاۋ

كورۋ: 692|جاۋاپ: 3

قۇتپاننىڭ تاعدىرى (اڭگىمە)

[جالعانىمدى كوشىرۋ]

4

تاقىرىپ

1

دوس

95

ءنومىر

جاس تالاپ

Rank: 2

جولدانعان ۋاقىتى 2015-8-4 01:32:37 |بارلىق قاباتتى كورسەتۋ
ءابدىعازى زاقان ۇلى

قۇتپاننىڭ تاعدىرى  

جەل ايداعان قاز باۋىر بۇلتتىڭ ساڭلاۋىنان كۇلىم قاعىپ شىعا كەلگەن اي سۇلۋ قۇنىپەرەن قۇيعىپ باردى دا جويقىن بۇلت شىمىلدىعىنىڭ قالقاسىنا ءوتتى. اي ساۋلەسىندە كەزەڭشەنىڭ بيىك باسىنا دەيىن سۇلاپ جاتقان جالعىز اياق جول سورابىن ايقىن اڭعارعان قۇتپان اينالاسىنا كوز قىدىرتىپ از- كەم تۇردى دا اقساڭداي باسىپ ءجۇرىپ كەتتى. ۇيتقي سوققان جەل قۇيپالاقتانعان باراق ءجۇنىن جامان تۇيەنىڭ جابۋىنشا جالبىرلاتتى.
قۇتپان كەزەڭشەگە دە شىقتى. استىرتتاعى كەڭ اڭعاردىڭ تەرىسكەي جيەگىندە قاراۋىتىپ «قوجاسىنىڭ» قوپىنى تۇر. سۇيرىك تاناۋىنا ساتكە ۇرىلعان ءتۇتىن ءيسىن جەل ايداپ الا جونەلدى. ءتۇتىن ءيسىن سەزۋى- اق مۇڭ ەكەن، ىشەك- قارنى شۇرىلداپ، سىلەكەيى شۇبىرا جونەلدى. وسىلاي ءبىر ءسات تۇرىپ قالعان ول ىزعارلى بوراننىڭ وڭمەنىنەن ءوتىپ بارا جاتقانىن سەزدى. سەزدى دە، قىراتتىڭ بەلۋارىنا تامان ءتۇسىپ، جۋان ءبىر ءتۇپ نار قاراعاننىڭ ىقتىنىنا ءوتتى. ەكى الدىڭعى اياعىن ۇسىنىپ جىبەرىپ، يەگىن تىزەسىنىڭ ۇستىنە قويىپ شوكە ءتۇسىپ جاتتى. كوزى ءالى قوپىندا.
ول ءوزىنىڭ بۇل اراعا نەگە كەلگەنىنە قايران قالدى. قاتىگەز قوجاسى ءوزىن كەشە عانا ولىمگە ۇكىم ەتىپ، اقپەرەننىڭ اۋزىنا ۇستاعان ەدى عوي. جەل اۋدارعان قاڭباقتاي مۇندا ۇشىرىپ كەلگەن نەندەي ءتىلسىم قۇدىرەت، قانداي سيقىرلى كۇش ەدى؟! قانداي قيماسى بار ەدى، مۇندا؟ الدە، قاتىگەز قوجاسىنان قايرىم كۇتىپ، مەدەت تىلەگەنى مە؟ بۇعان ءوزىنىڭ دە ءداپ باسار بايلاۋى جوق سەكىلدى. سولايدا باۋىرىن كوتەرگەن مىناۋ تۋعان توپىراعىنىڭ قىشقىل سور ءيسى كەڭسىرىگىن ۇرعاندا- اق كومەيىنە الدە نە كەپتەلە قالدى. ارا ءتۇسىپ جانىن اراشالاعان «ايەل قوجاسى» كوز الدىنا ەلەستەپ كەتتى. جانىن شۇپەرەككە ءتۇيىپ قورعاعان ماڭعاز، مومىن «پەندەلەرىنىڭ» شالاپتىڭ جۇعىنىنداي عانا اناۋ ازعانا سارقىنى ويىن بولە بەردى.
قۇتپان كوزىن جاڭا اشقان كەزىندە قوجاسى ەنەسىنەن ءبولىپ ۇيىنە الىپ كولگەن. اسىرا ايتقان ادامعا بالاسىنشا ايالاپ باققان ەدى عوي. وعان قايدان كوز جۇما السىن؟! الجۋعا جاقىن جۇرگەن اق توبەتكە ەرىپ، ءتۇن بويىنا شاۋىلدەپ ۇرگەنىنە- اق ءۇمىت كۇتكەن قوجاسى موينىنا كەستەلى قارعى باۋ تاعىپ الپەشتەدى. وسە كەلە قۇتپان دا كۇتكەن جەرىنەن شىقتى. ساققۇلاق، قوراشىل بولار بەيىم بايقاتتى. ايتسا دا، العاشىندا قۇتپان اتى جوق ەدى. انشەيىن، تۇسىنە قاراي «قارالا» دەپ جايىن ات قويىلا سالىنعان. قۇتپاندى اكەلگەن جىلى مال جەكەگە ءبولىندى دە، جەرەبەدەن باعى جانعان قوجاسىنىڭ قۋانىشى قوينىنا سيمادى. اينالاسى بىرنەشە جىلدا- اق، ءاۋ باستاعى ازعانا قاراڭ- قۇراڭى ەداۋىر قوماقتى قورا بولىپ شىعا كەلدى. «قارالا بوساعامىزعا كەلگەلى باعىمىز اشىلىپ، ەڭبەگىمىز جاندى. ءيت جەتى قازىنانىڭ ءبىرى دەيتىن ەدى، قۇت الا كەلگەن قۇتپانىم بولدى عوي!»دەپ اعىنان اقتارىلدى. سونان بىلاي ول قۇتپان اتانىپ كەتىپ ەدى. «تاي قازاننىڭ» ارقار جالاعىنان ولمەس ءولجال الىپ كەلگەن جاننىڭ اۋزى اسقا جارىپ، اۋى اتقا تولعاسىن اعىنان اقتارىلماي قايتسىن! «كەلىننىڭ اياعىنان...» دەگەن ىسپەتتى جاقسى ىرىمعا جورىدى. سونان دا قۇتپان قادىرلى، اياۋلى بولدى. ايتسە دە، قوجاسىنىڭ مالى وسكەن سايىن باسىنا قالتاق، قولىنا تارتىناق جابىستى. كوبەيگەن سايىن كوزىنە ءشوپ قۇرلى كورىنبەدى. اقىلىن تەلىم، جەگەنىن جەلىم ەتىپ وسىرە بەرگىسى كەلدى، وسىرە بەرگىسى كەلدى. جاپاسىن تارتۋدى بىلسە دە راقاتىنا كەنەلۋدى ۇمىتتى. ايتا بەرىپ نە كەرەك، ادام بالاسىنىڭ ارانى اشىلسا بوگەۋ بەرمەس اپات ەكەن...
تارپاڭ ءتابيعات تۇتقيىل ءتۇيىلدى. ايتا قالسىن، اتى شۋلى جۇت ءجۇردى. «باي ءبىر جۇتتىق» دەگەن اتالى ءسوز بار عوي. سول ءسوزدىڭ بۇلجىماس اقيقات ەكەندىگىنە قۇتپاننىڭ، جو- جوق، قوجاسىنىڭ كوزى ابدەن جەتتى. جەتكەنى بار بولسىن، ول نەگە قاجەت؟ نەشە تاۋلىك بويى ءنار تاتپاي قۇر سۇلدەرى قالعان، جىلاي- جىلاي بەت- اۋزى ءىسىنىپ، قارعىستان تاماعى قارلىققان بايقۇس پەندە، تاۋ بولىپ ۇيىلگەن اق سوڭكە جەمتىكتىڭ قاسىندا ۇزاق وتىردى. جىندانعان كەيىپتى، ۇسقىنىنان ادام شوشىرلىق.
قۇتپان قوجاسىن اياپ كەتتى. امالى نەشىك، ۋاتارعا ءتىل جوق. بار بولعانى قايعىسىنا ورتاقتاسار ىڭعىلمەن قاسىندا شوڭقايىپ وتىردى دا قويدى. ءوز ءىشى دە ۋداي اشىپ بارادى. بىردە- بىرەۋىنىڭ تاڭىنا ءتۇز تاعىسىنىڭ قانقۇيلى ازۋىن دارىتپاي، بىرەۋىنىڭ دە جونىن ۇرى- قارىعا سيپاتپاعان «مومىن پەندەلەرى» اق سۇيەك بولىپ ءۇيىلىپ جاتىر. قوجاسىنىڭ عانا ەمەس، ءوزىنىڭ دە تىرلىك تىنىسى ەدى عوي ولار. قۇتپان شىداي الماي قىڭسىلاپ جىبەردى. جالت قاراعان قوجاسى وقتى كوزبەن اتتى. ساقالى شولتاڭداپ، بەت- اۋزى تىرجىڭداپ كەتتى:
_ تاڭ بويى شوقىدان تۇسپەي قاقسانۋىڭ الەي ەدى، ءوستىپ ۇلىتىپ جۇرتتا قالدىرايىن دەگەن ەكەنسىڭ عوي. جاۋ كورگەندەي قىڭسىلاپ ەتەگىمە تىعىلۋىن قاراشى ەندى، سۇمپايىنىڭ، تاعى نە سويقان تىلەپ تۇرسىڭ؟! و اكەڭنىڭ...
ابايسىز تۇرعان قۇتپان بۇيىردەن تيگەن اۋىر سوققىدان ۇشىپ تۇسە جازدى. «قاڭق» ەتتى دە، قورا شەتىنە تايساپ شىعا بەردى. ۇيگە جۇگىرە كىرگەن قوجاسى اۋ مىلتىعىن الىپ شىقتى دا كوز ىلىندىرمەس جىلدامدىقتا جۇرەلەپ وتىرا قالدى. «تارس» ەتكەن مىلتىق داۋسىمەن بىرگە ەكى بۇكتەلىپ دومالاپ ءتۇستى قۇتپان. ەسىنەن ايرىلىپ بارىپ قايتا تۇزەلدى. قوجاسى ءتونىپ كەلىپ مىلتىعىن سەرت ۇستاپ تۇر ەكەن. قاتۋلانىپ الىپتى، جانىن جاھانامعا جونەلتىپ تىنباققا بەكىنگەن ءتۇرى بار. ورنىنان سۇيرەتىلە تۇرعان قۇتپان قۇتىلار دارمەنىنىڭ قالماعانىن ءبىلدى. وڭ اياق تىرەۋدەن قالىپتى، جاۋىرىنى ۇگىلىپ كەتكەن ءتارىزدى. ونىڭ ءالى ولمەگەنىن كورگەن قوجاسى مىلتىعىن كەزەپ قاراعا الا بەردى.
_ قۇتىرعانبىسىڭ؟! ءيت بولسا دا قول اسىراعان قارىزى بار عوي. ءيت تەپكەننىڭ ىرىسى شايقالادى دەگەن. قۇدايدىڭ جىبەرگەن جۇتىنا دا ول بايقۇس كىنالى ما ەدى؟! قويا بەر!_ جۇگىرە جەتكەن ايەلى قولىن قاعىپ قالدى. ىسقىرىپ توبەسىنەن وتكەن وق سونادايتىننان شاڭ بەردى...
قارنى اشىپ قالجىراعان، توڭىپ جاۋراعان قۇتپان ءبۇرىسىپ جاتىپ ۇيقى قۇشاعىنا قۇلاعانىن سەزبەي دە قالدى. جاڭاعى وي جۇلگەسىنە مەڭزەس بولار، قوجاسىنىڭ مالى تۇگەل، تۇلەجىپ تۇرعان كەزىن تۇسىندە كوردى. ءوزى دە سونداي يناباتتى ءجۇر ەكەن. كۇندىزى قوجاسىنىڭ قاسىندا-_ قوي سوڭىندا دا، كەشىندە قورا شەتىندە_ توبە باسىندا. سول باياعى كادۋەلگى قالپى. قوجاسىنىڭ ايەلى جونىنان سيپاپ تۇرىپ اس بەردى، ال قوجاسى قۋانا قاراپ، مەيىرلەنە كۇلىپ تۇرسىن...
قۇتپاننىڭ شىرىن ءتۇسى بۇزىلىپ كەتتى. «باج» ەتكەن ەشكى داۋسى ورنىنان تىك تۇرعىزدى. اينالاسىن شولا قاراپ، قۇلاعىن تىگىپ تۇرا قالدى. سۇمدىق! جۇتتان قالعان ازعانا تۇياققا كوكجال ارلان ارالاسقان ەكەن. قورانىڭ ورىندەگى قاپتالدا قاندى قىرعىن ءجۇرىلىپ جاتىپتى. قوجاسىنىڭ قوپىنىنان قىبىر ەتكەن قىلپ بىلىنبەيدى. قۇتپان ەكىلەنگەن جوق، ىرا تومەن قۇلدىراڭداي جونەلدى. ءوزىنىڭ كەمتار، كەلەكە كەيپىن دە ۇمىتىپ كەتتى.
قۇتپان شويناڭداپ ۇشىپ كەلەدى. ساۋ كەزىندەي- اق تەز جۇگىردى، تەز جەتتى. اشىققان ارلان دولىرىپ العان ەكەن، بەت كەلگەندى جاساتار ءتۇرى جوق، قىرىپ- جويىپ ءجۇر. قۇتپان ءۇن شىعارمادى، تىرمىسىپ ارلانعا تاياي بەردى. تاماقتاي ۇستاعان اتان سەركەمەن تىكتەسىپ از تۇرعان ارلان باسىنان اسىرا اتىپ قالىپ ارتىنا بۇرىلا بەرگەن ەدى، بەتپە- بەت كەلىپ قالعان قۇتپان «ارس» ەتتى دە القىمىنان الا ءتۇستى.
ارىنداي كەلگەن، اشىنىپ الاس ۇرا كەلگەن ادۋىن ازۋ قاۋىپ ۇستاپ، قاتىپ قالدى. وسىلاي، ولىسپەي بەرىسپەس ارپالىستى الىس باستالدى دا كەتتى. سايىس ۇزاق جالعاستى.ءبىرىن- ءبىرى شايناپ قان جوسا قىلدى. قۇلاق جۇلىنىپ، ەرىندەر جىرىلدى. بەت تەرىلەرى سىدىرىلىپ، جىلىنشىكتەر مىلجالاندى. ايتسەدە، ارلان باسىم كەلىپ، ءوزى بۇرالىڭقى، كەم ساليقا قۇتپاندى بۇگىلتە بەردى. قۇتپان دا وكتەم كۇش الدىندا قايمىعار ەمەس، بار قايراتىن سالىپ قارسى شاۋىپ ءجۇر. مىنەكي، سىقاياق قۇتپان وڭتايلى ورايدى جىبەرمەدى، ءبىر مەزەتتە ارلاننىڭ القىمىنان سىعا ۇستادى. جاندارمەن بۇلقىنعان ارلان ازۋىن دارىتا المادى، ازدان سوڭ- اق اپتىگى باسىلىپ، تىنىسى بۋىلا بەردى. كوزى الاقتاپ، اياعىن جانتالاسا سەرمەپ قىرقىراي باستادى...
«الدىرار كۇنى جازدىرعان» ولىك ۇيقىدان تاڭ شەتى سوگىلگەن ساتتە باس كوتەرگەن قۇتپاننىڭ قوجاسى قاڭىراپ قالعان قورانى كوردى. تاڭ راۋانىندا قارسىداعى سەكىدە ۇركەردەي ۇيلىعىپ شۋلاپ تۇرعان ءبىر تپ قوي- ەشكىنىڭ بارانى شالىقتى كوزىنە. باۋىزداۋى قان جوسا بولىپ ەتەگىنە تىعىلعان اق تۇساق زارەسىن ءزار تۇبىنە جەتكىزدى. ويبايلاپ تۇرا جۇگىردى. ءار جەردە تەڭكيىپ- تەڭكيىپ جاتقان ولەكسەلەردى كورگەن سايىن بۋىنى قۇرىپ ەكپەتىنەن- ەكپەتىنەن ءتۇسىپ جىعىلا بەردى. ايتسەدە، ويبايىن تيعان جوق:
_ قۇداي- اۋ، قۇداي، شۇناق قۇداي- اي، قۇرتقانىڭ با ءوستىپ؟!...
قانشا ۋاق وتكەنى بەيمالىم، قۇتپان ەسىن جيدى. ايتسەدە، نۇرى ءسونىپ ولەۋسىرەگەن ءالسىز جانارى قارسى الدىندا تۇرعان قوجاسىن ايىرا المادى. بۇلىڭعىرلانىپ بىردە ەكەۋ، بىردە جالعىز بولىپ قۇبىلا بەردى. ال اناۋ نە زامات قىبىرسىز سىلەيىپ تۇرعاننان كەيىن بارىپ الدە نەلەردى كۇبىرلەگەندەي بولدى. قۇتپان سوندا عانا ونىڭ ءوز قوجاسى ەكەنىن انىق تانىدى. تانىدى دا، ونان الدە قانداي ەمەۋرىن كۇتكەندەي ولەۋسىرەگەن، وشكىن جانارىن تىگىپ ۇزاق جاتتى. ءبىراق قوجاسى ەمىرەنگەن دە، ەسىركەگەن دە ىڭعاي بىلدىرگەن جوق.
قوجاسى ەندى كەلىپ قاسىنا جۇگىنىپ وتىردى. بۇل كەزدە قۇتپاننىڭ ادۋىن ازۋى ءالى ارلاننىڭ القىمىندا_ قاپسىرا ۇستاعان بويى قاتىپ قالعان كۇيىندە ەدى. قوجاسى كۇيبىڭدەپ كوپ الىستى، ءبىراق، قۇتپاننىڭ قارىسىپ قالعان جاعى ارلاننىڭ القىمىنان بوسامادى. اجىراتۋعا قول قارىمى جەتپەگەن سوڭ، سىپتىعىرلانعان ۇشقات تاياعىن استىڭعى ەزۋىنەن سالىپ جىبەرىپ ارى وتكىزدى دە، ەكى ۇشىن تابانعا باستى. سوسىن، قوس قولداپ تۇرىپ قۇتپاننىڭ جاعىن كەرە تارتتى.
قۇتپاننىڭ جاعى ايرىلىپ كەتتى. «قاڭق» ەتكەن اشتى داۋىس شىقتى دا سۇلىق قالدى. قوجاسى ەندى كوپ بوگەلگەن جوق، ءون- بويىندا الاقانداي ساۋ جەر قالماي جۇلىم- جۇلىمى شىعىپ قانعا بويالعان قۇتپانعا مۇسىركەي قاراپ از تۇردى دا، ارلاننىڭ ولىگىن دىرىلداتا سۇيرەپ ەتەككە بەت الدى .


33

تاقىرىپ

2

دوس

1049

ءنومىر

تەتە رەداكتور

Rank: 8Rank: 8

جولدانعان ۋاقىتى 2015-8-4 15:30:17 |بارلىق قاباتتى كورسەتۋ

4

تاقىرىپ

1

دوس

95

ءنومىر

جاس تالاپ

Rank: 2

جولدانعان ۋاقىتى 2015-8-5 22:42:30 |بارلىق قاباتتى كورسەتۋ
قولداعانىڭىزعا راحىمەت، قارا ءسوز يىرىمىندە قايىمداسىپ تۇرالىق...

5

تاقىرىپ

2

دوس

1510

ءنومىر

اعا بۋىن مۇشە

Rank: 6Rank: 6

جولدانعان ۋاقىتى 2015-8-31 16:43:34 |بارلىق قاباتتى كورسەتۋ
ادامنىڭ مۇدە ءۇشىن قاسقىردان دا جاۋىز ەكەندىگى مەن مۇندالاپ تۇرعانداي.
جازار كوبەيسىن. ادال وقىرمانىڭ بولا بەرەلىك............

كوڭلدى كۇندەر بولعاي.
ءسىز تىركەلگەننەن كەيىن جاۋاپ جازا الاسىز تىركەلۋ | تىزىمدەلىڭىز


Archiver|قولفون نۇسقاسى|新疆作家哈文网
Powered by Discuz! X2.5(NurQut Team)© 2001-2011 Comsenz Inc. For www.xjzjxh.com
جوعارى جاق