تالداڭىز قولفون فورماسىنا ءوتۋ | كومپيوتەر ءتۇرىن جالعاستى ارالاۋ

كورۋ: 992|جاۋاپ: 2

تەڭىز، اقبوز ات جانە سارى اتان

[جالعانىمدى كوشىرۋ]

7

تاقىرىپ

1

دوس

56

ءنومىر

جاس تالاپ

Rank: 2

جولدانعان ۋاقىتى 2015-10-17 23:36:20 |بارلىق قاباتتى كورسەتۋ
قاديلا نۇرعالي قىزى
(جاي جازبا)

تەڭىزدى تۇڭعىش كورۋىم 2010-جىلدىڭ قاڭتار ايى. ۇشاقتىڭ ارقاسىندا التايدىڭ سارى شۇناق ايازىنان ءبىر-اق كۇندە تامىزدىڭ تامىلجىعان لەبى بار حايناننىڭ سانياسىنا جەتىپ بارعانبىز. ارينە، ول جەردە كادىمگىدەي جاز. سوندا قاس-قاعىم ساتتە ماۋسىمنىڭ شەگاراسىنان وتە شىققانداي عاجاپ سەزىمگە كەنەلىپ ەدىك، كوڭىلدىڭ شاعالاسىن شارىق ۇردىرار تاماشا سەزىمدى تەڭىز جاعاسىنان تاپقانبىز. بۇرىندارى تەڭىزدى قيالىمىزبەن سەزىنىپ، قۇر تۇيسىككە سۇيەنىپ بەكەر تەبىرەنىپ جۇرگەن ەكەنبىز. تەڭىزدىڭ تابيعاتى ادام مىنەزدەس ەلەستەدى ماعان. بىردە، كوكىرەگىن وي بۋعان موماقان كىسى تاقىلەتتەس جاي عانا تولقىپ، جاعاعا كىلكىپ كەلىپ، ءۇنسىز قايتسا، بىردە  جاعانى جيناپ قوينىنا وراپ الا قاشقىسى كەلگەندەي الاقۇيىندانىپ كەلەدى دە، جۇدىرىقتاي جاقۇت مونشاقتارىن اسپانعا اتىپ، دەمنىڭ اراسىندا ساباسىنا ءتۇسىپ جالت بۇرىلىپ جايباعىستاپ قايتا كەتەدى. جىم-جىلاس جاعادا تۇرعانىڭدا توڭكەرىلە جەتكەن اقجال تولقىننىڭ قاي زاماتتا كەلىپ قالعانىن بىلمەي قۇشاعىنا توعىتىلىپ سوراعىتا قاشقان شاعىڭ كوڭىل قۇسىڭ شارىقتاپ تولقىنمەن بىرگە كەتىپ قالۋعا شاق-شاق قالاتىن تەبىرەنىستىڭ شىرقاۋ ءساتى بولارى شاكسىز. ۇيتەتىنى، تەڭىز مەنى بۇرىن-سوڭدى تىم جەلپىنە بەرمەيتىن تابيعاتىمنان ايىرىپ، مامىقتاي جەڭىل ءبىر كۇي كەشتىرگەن-تۇعىن.
بۇگىنگى ايتپاعىم وزگەشەلەۋ اڭگىمە. تەڭىزبەن ەكىنشى مارتە قاۋىشۋ ءساتى مەنى انشا قۋانتا قويعان جوق، قالاي ەكەن، مۇنارتىپ عانا كوز ۇشىنا ىلىنگەن سۋ بەتى كوڭىلدەگى الدەبىر بەلگىسىز مۇڭدى قوزعاپ، اۋىرلاتا بەردى. جاعادا ءيىن تىرەسكەن ساياحاتشى. مىناۋ قارا ءنوپىردىڭ ىشىندە تەڭىزدىڭ سىرىنا بويلاعىسى، قاسيەتىن سەزىنگىسى كەلەتىن بىردە-ءبىر جان جٶق ءتارىزدى. ونىڭ مۇڭىن، ءتىلىن ەشكىم تۇسىنبەيتىن سەكىلدى، ۇنسىزدىگىنە، ناراۋلىعىنا ەشكىم كوڭىل اۋدارمايتىن سەكىلدى. بارلىعى تەڭىزدىڭ تەلەگەي بولمىسن اپپارات كوزىنەن ىزدەيتىندەي. قاساڭ قاعيدا، جاتتاندى داعدى بولىپ قالعان فورمادا ايكەلشە تۇرا قالىپ، سيفرلى اپپاراتتارىن، ماركالى قولفوندارىن جارىق-جارىق ەتكىزىپ سۋرەتكە تۇسەدى دە، تاماشادان قالاتىن كىسىشە الدەقايدا اسىعىس جونەلەدى. ولارعا سوگىس جوق، «كوركەم كورىنىس، كوڭىلدى شاقتىڭ كۋاسى-سۋرەتتەر ەستەلىك بولىپ قالادى» دەيتىن شىعار، مەزگىلدىڭ ءورت قۇشاعى سۋرەتكە تۇسكىش جانداردىڭ ءوزىن كۇلگە اينالدىرىپ ۇمىتتىرىپ جوق قىلىپ جىبەرىپ جاتقاندا، جانسىز قاعاز-سۋرەتتىڭ قانشا بايانى بولادى دەيسىڭ. بارلىعى دا كوڭىلگە مەدەت، كوزگە الدانىش بولسىننىڭ قامى باياعى. ويىمدى بىلەگىمنەن تارتقىشتاعان الدەكىمنىڭ تۇسىنىكسىز ءسوزى ءبولدى، «ايجامالىڭىزدى سەكۋندقا جەتكىزبەي اپپاراتىما قوندىرىپ، مينۋدقا جەتكىزبەي سۋرەتىڭىزدى شىعارىپ بەرەمىن.»-دەپ زىر-زىر ەتكەن جەرگىلىكتى سۋرەتشىنىڭ نۇسقاعان باعىتىنا كوز سالدىم. تەڭىز جاعاسىنداعى قالتقىنىڭ جانىندا بايلاۋلى اقبوز ات، ارعى جاعىندا يەگىن جەرگە سالىپ شوكە ءتۇسىپ سارى اتان جاتىر. قۇيرىق-جالى ورىلگەن اقبوز ات ءبىر كورمەككە سۇمبىدەي سۇلۋ. سارى اتاننىڭ قاسىنا بارعاندا، جانارىنا شوككەن تەڭىزدەن اۋىر مۇڭدى بايقادىم. كەۋدەسىن جەرگە توسەپ بىلىق ەتپەي جاتقان سارى اتاننان گورى تاماشاشىلار اقبوزاتقا ءۇيىرىلىپ جۇر. اقبوزاتتىڭ  جۋاستىعى سىمباتىنا ساي كەلمەيتىندەي، ماڭىنا ادام بارسا، قاسىنا قويىلعان تەمىر ساتىعا ەشكىمنىڭ جەتەگىنسىز جاقىنداپ بەيىمدەلىپ تۇرا قالادى. ارينە، تەمىر ساتى اتقا ءمىنپ كورمەگەندەر ءۇشىن دايىندالعان. بالاكەزىمدە اقبوز ات دەسە قيالىمدا اقبەرەن مىلتىق تاعىنىپ، الداسپانىن ۇيىرگەن باتىر بابامنىڭ تاقىمىندا كورىنەتىن، تۇياعىن وت شاشاتىن شالقۇيرىق شابىستى ارعىماق ەلەستەيتىن. ەرتەرەكتە اعامنىڭ قۇيرىق-جالى توگىلگەن ءمولدىر  قارا جورعا اتى بار-تۇعىن، اعامنان وزگە جاندى جانىنا جۋىتپاۋشى ەدى، قايران جانۋار، سول سەرلىگىنەن، پەرىلىگىنەن كارتەيىپ حالى كەتكەنشە ايىرىلعان جوق. مەنىڭ قيالىم تەڭىزدىڭ تەنتەك تولقىنىنداي تولقىپ تاسىپ قايتقانشا، اقبوز اتقا تالاي ادام  ءمىنىپ (ءمىنىپ دەگەننەن گورى ساتىمەن شىعىپ دەگەن قيسىندىراق) سۋرەتكە ءتۇسىپ جاتتى. كوزىندە قاجىعاندىقتىڭ بەلگىسى بولسادا، وسىناۋ تەمىر ساتىعا، ۋ-شۋعا، جارىق-جۇرىق اسپاپقا، تولاسسىز شىعىپ-ءتۇسىپ جاتقان ءتۇرلى تاقىمدارعا ەتى ابدەن ۇيرەنىپ كەتكەن سياقتى. سەلت ەتپەي ارقاسىن توسەپ تۇرعانى تۇرعان. ال، سارى اتان قارا جەردى قۇشىپ سۇلىق جاتىر، جانسەبىل جارىقتىق بار دۇنيەدەن ءباز كەشكەن-اۋ دەيسىڭ، جاعاداعى داڭعازا، ماڭىنداعى قىزىقتاعان كىسىلەر كاپەرىنە كىرمەيتىن سىقىلدى، ادامداردىڭ ءبىر كۇندىك قىزىعىنا بولا بۇگەجەكتەپ، ادىمى اشىلماي، اياداي اۋماقتا قاڭتارلعانىنا وكپەلى مە كىم ءبىلسىن، اقبوزاتتاي ەمەس، يەسىن كۇيگەلەكتەندىرىپ، قىرىستانىپ ورنىنان ارەڭ تۇرادى... سارى اتانعا قاراپ تۇرىپ:
ەكى تالاي كۇندەردە يەلەرى ،
ازاپ -سورىن اتانعا تيەپ ەدى ،
اتانىنا ارقاسىن سۇيەپ ەدى ،
اتان بايقۇس نەسىنە سۇيەنەدى ؟!-دەگەن مۇقاعالي اقىننىڭ ولەڭى ويىما كەلدى، «وركەشىندە جىر بوتالاپ، بوزداۋىنان كۇي ونەتىن، ساحارانىڭ شۇبىرعان تۇيەلەرى» دەپ ەمىرەنگەن ەسىل اقىن تەڭىز جاعاسىنداعى باسى-كوزىنە سابالاتىپ، تەلمەڭدەپ جاتقان سارى اتاندى كورسە قايتەر ەدى... اتاندى ارقاسىنا «سالا» سالىپ، تەڭىزگە قويىپ كەتەرمە ەدى...
كوكجيەككە قىزىل شىتىن قالتىرعان كۇن تەڭىزگە سۇڭگىپ بارا جاتتى. تەڭىز ىشتەن تىنعان كىسىدەي جىم-جىرت، تولقىمايدى، سونادايدان بەتىڭە ۇرىلاتىن سالقىن دەمى دە جوق... قارا جەردىڭ قايرانداپ قالعان قايىعى-سارى اتان جەردەن باسىن كوتەرمەيدى. اقبوز ات يەسىنىڭ جەتەگىندە قوس وكپەدەن تەپكىلەگەن وكشەنى كاپەرىنەدە الماي شەڭبەر ىسپەتتى شەكتى ايادا ميىمىرتتاپ اينالىپ ءجۇر...

5

تاقىرىپ

2

دوس

1470

ءنومىر

اعا بۋىن مۇشە

Rank: 6Rank: 6

جولدانعان ۋاقىتى 2015-10-23 09:29:47 |بارلىق قاباتتى كورسەتۋ
تاماشا ساتتەردىڭ ەستەن كەتپەس ەلەستەرىن ەلەستەتكەن تاماشا ۇسىنىلىم ەكەن.
كوڭلدى كۇندەر بولعاي.

9

تاقىرىپ

11

دوس

751

ءنومىر

تەتە مۇشە

Rank: 4

جولدانعان ۋاقىتى 2015-12-9 12:05:09 |بارلىق قاباتتى كورسەتۋ
قاديلا قالامداسىم قالامىڭا قارىمدىلىق تىلەيمىن. قۇندى جولداما
ءسىز تىركەلگەننەن كەيىن جاۋاپ جازا الاسىز تىركەلۋ | تىزىمدەلىڭىز


Archiver|قولفون نۇسقاسى|新疆作家哈文网
Powered by Discuz! X2.5(NurQut Team)© 2001-2011 Comsenz Inc. For www.xjzjxh.com
جوعارى جاق