تالداڭىز قولفون فورماسىنا ءوتۋ | كومپيوتەر ءتۇرىن جالعاستى ارالاۋ

كورۋ: 423|جاۋاپ: 2

وقىپ كورىڭىزشى

[جالعانىمدى كوشىرۋ]

6

تاقىرىپ

1

دوس

125

ءنومىر

جاس تالاپ

Rank: 2

جولدانعان ۋاقىتى 2015-11-30 00:03:31 |بارلىق قاباتتى كورسەتۋ

جەڭىس تولەۋباي ۇلى

                                                     ءسابي جانارى

                                                       ( اڭگىمە)

قىزىمدى زورلاعان جىگىتتىڭ اتى- ءجونىن ەستىگەندە توبەمنەن جاي تۇسكەندەي بولدىم. قىلمىس كۇماندىسىن تىرىدەي پىسىرىپ جەيتىندەي  بولىپ جۇرگەن جان جاراما ەندى وكىنىشتىڭ تۇزى سەبىلىپ، ونان ارى اشىتىپ جىبەردى. باعانادان داۋرىعىپ وتىرعان مەنىڭ توسىننان  مەڭ- زەڭ كۇيدە قالعانىمدى اۋىر پيسحولوگيالىق سوققىنىڭ كۇشى دەپ ويلاسا كەرەك، ساقشى ازامات ساسقالاقتاپ قايناق سۋىن  ۇسىندى.
_ وزىڭىزگە مىقتى بولىڭىز. قىلمىس كۇماندىسى ءبارىن مويىنداپ وتىر. ول زاڭ قۇرىعىنان قۇتىلا المايدى، ەلىمىزدىڭ قىلمىستىق ىستەر زاڭىندا << باسقىنشىلىق جاساۋ قىلمىسىن قاتاڭ جازالاۋ >> ايتىلعان. زاڭ ءادىل. تۋرالىقپەن شەشەتىنىنە سەنىڭىز.. ەڭ ابزالى ۇيىڭىزگە قايتىڭىز. شارلاۋشى ماشينامىز جەتكىزىپ قويسىن. _ دەپ مەنى جۇباتىپ جاتىر.
ۇيگە كەلگەننەن كەيىن دە  زىلماۋىر ويدان ارىلا المادىم.
راس، سول بولعانى ما؟!
كيىمىمدى ءىلىپ جاتىپ ايەلىمە قاراپ ەدىم، وسى ءبىر اپتانىڭ ىشىندە جاعى قۋشيىپ، جۇزى سەكپىلدەنىپ سۇرەپەتى قاشىپ جۇدەي قالىپتى،
_قىزىمىز قايدا _ دەپ ەدىم.
_ ول قانشىقتى ناعاشى اپايى ەرتىپ كەتتى. <<اسىلىپ ولەم >> دەيدى، مەن زورلاتقانداي، سوعان از قاقسامادىم، كەش بولعاندا قاڭعىعاندى قوي دەدىم، ساباعىڭدى قارا، بيىل كوشپەسەڭ ەندىگى جىلى جولىڭ بولىپ قالار دەدىم. از اقىل ايتپادىم، << قىزى جاقسىنى قىدىر قوريدى، قىزى جاماندى شايتان توريدى>> دەپ ەندى مىنە بەتىمىزدى جەرگە قاراتتى، سۇيەگىمىزگە تاڭبا بولدى، سەنىڭدە اكەلىك ايبارىڭ جوق، قىمسەتسە اندەپ شىعا كەلۋشى ەدىڭ. ەندى ەل بەتىنە قالاي قارايمىز، جەردە تەسىك بولسا ءازىر كىرىپ كەتكىم بار.- دەپ بۋلىعا سويلەپ تاماق ۇيىنە كىرىپ كەتتى.
شالدەر- شۇلدىر ەتكەن ىدىس اياق ۇنىنەن ونىڭ دولدانىپ جىلاپ تۇرعانى بەسەنەدەن بەلگىلى ەدى. <<ۇل ۇياتى اكەدە، قىز ۇياتى شەشەدە>> دەپ انا ەمەسپە ، بالاپانىن قىرعيعا الدىرعان تورعاي ەكەش تورعايدا شىجاقتاپ شىر اينالادى عوي
وسىدان ءبىر اپتانىڭ الدىندا اقشام سونە باستاعان مەزگىل بولاتىن.<< دوسىمنىڭ ۇيىنە بارامىن>>دەپ شەشەسىنە بوي بەرمەي شىعىپ كەتكەن قىزىمدى ءبىر  ماس جىگىت قالتارىس كوشەنىڭ  جاعالاۋىنداعى توعاي ىشىنە سۇيرەلەپ اپارىپ زورلاپ كەتىپتى ،ايرانداي ۇيىپ تۇرعان تىنىشتىعىمىزدىڭ شاق شالەكەيىن شىعارعان ۋاقيعا وسىلاي ەدى.<<ون ەكىدە ءبىر گۇلى اشىلماعان>> جالعىز قىزىمنىڭ الدە بىرەۋ ارتىن سۇرتىپ لاقتىرا سالعان قاعازداي قالدە قالعانىن ويلاعاندا ، ءون بويىمدى نامىس تىستەلەپ ساقشى مەكەمەسىنە بارعان ەدىم.
قىزىمدى زورلاعان جىگىت راسىندا سول بولعانى ما؟!
كوز الدىما وتكەن ىستەر ورالا بەردى.
بۇل جيىرما جىلدىڭ الدىنداعى ءىس ەدى.
مەن ءبىر مەكەمەنىڭ شوپەرى بولتىنمىن. ول كەزدە ءبىر جانۇيادا  ءبىردەن جەڭىل تيىپتەگى اپتوكولىك پەن قازىرعىداي جالتىراعان اسپاليت جول قايدا، ات اربانىڭ ابىرويى كەتە قويماعان زامان ەدى، تەلەفوننىڭ ءوزىن تەلەگرف مەكەمسىنىڭ جالعاۋىمەن شالاسىڭ. <<توي جۇمىسىمەن>> <<ولىم ىسىمەن>> تاعى باسقا جۇمىستارمەن الىستاعى اۋىلدارعا  باراتىندار بىزگە جالىناتىن. << اتامنىڭ اتاسىنىڭ اتاسى ابىلايدىڭ ارباكەشى بولىپتى>> دەپ اۋلىمىزداعى ءبىر بوسپەنىڭ شىرەنگەنىندەي مەنىڭدە بەدەلىم بەس باتتام، ابىرويىم التى باتتام ەدى.كۇندىز مەنشىكتى<<دوكەيىمدى>> قالاعان جەرىنە اپارىپ، اكەپ تاستاعاننان كەيىن، كەشتە ءوز تىزگىنىم وزىمدە <<ءتوسىم جايلاۋ، توبەم قىستاۋ>> سايران قۇراتىنمىن. <<ماشينا ايداۋدى ۇيرەنگەندەر كەلەشەكتە كاسىپسىز قالمايدى>> دەپ گازەتتەردە جازىپ جاتاتىن.
<<پاتشانىڭ بار سىرىن بىلەتىن سەنىمدى اتەگىندەي >>مەنى دوكەيىمدە شەتكە قاعىپ كەتپەيتىن. <<انا جەرىن جوندەتتىم، مىنا جەرىنىڭ سايمانىن اۋىستىردىم>> دەپ اكەلگەن تالوندارىمدى كوزىن جۇمىپ تۇرىپ، بۇرىشتاي سالاتىن دا << ماشينا دايار بولسىن، اۋىلعا بارىپ قىزمەت تەكسەرەمىز>> دەپ قورازداناتىن. مۇلىك ۇيىمدە ماشينانىڭ ارتىق زاپشاستارى، جانار ماي دەگەندەر بارشىىلىق بولىپ، وزگە مەكەمەدەگى شوپەرلەرگە قاراعاندا <<باستىعى باسىنان سيپاعان>> ەركەسى مەن ەدىم.   
كەيدە دوكەيىم <<تاس وتكەلدەگى تامىرقاننىڭ قوراسىنا بارىپ قويلارىمنىڭ ىشىنەن ەڭ سەمىزىن الىپ كەل، بالەن باسەكەڭ ايەلىمەن بالا شاعاسىمەن ۇيىمە قوناق بولىپ كەلەتىن بولدى، وزىڭدە بىرگە بولىپ كۇتىسىپ جىبەر...>> دەپ جۇمساسا. <<كوكتالداعى كوكيگە بارا كەل، بيىل سوعىم بەرەتىن بولعان ، سەمىز بولسىن دە، سيىر ەمەس جىلقى الامىن>> دەپ تاپسىراتىن. <<ايماقتاعى باسقارماعا جەتكىزەتىن مالىمەت بار، سونى قازىنا ءبولىمىنىڭ جاۋاپتىسى ەكەۋىڭ اپارىپ،  قايتار جولىڭدا ايماقتىق دوىتىرحانادا جاتقان  قايىن اپامدى الا كەلەسىڭ>> دەيتىن بۇيرىقتاردىڭ سان ءتۇرىن <<ءلاپپاي تاقسىرمەن>> ورىنداپ جۇرگەن ماعان دوكەيمنىڭ حانىمىنىڭ دا قاباعى اشىق ەدى.  <<وسى شوپەر قاينىمنىڭ اياعى قۇتتى، جولى شۇلەن>> دەپ مەنى قولپاشتاپ، سيلى قوناقتاردان قالعان قىمبات اراق تەمەكىمەن جارىلقايتىن.
<<شوپەردى بايىم بار دەمە، شاقپاقتى وتىم بار دەمە>> دەپ شاقپاعى وت الماي قارلى بوراندا ءۇسىپ ولگەن شوپەر وسيەت  قالتىرىپتى دەگەن اڭگىمە سول كەزدە ءار كىمنىڭ اۋزىنان ايتىلماي قالمايتىن قارىمدى قالجىڭ ەدى، كۇنى بويى ءۇي بەتىن كورمەيتىن  دالا بەزەر مەندە جولشىباي كەزدەسىپ قالاتىن ايەل زاتىنا قىرىنداي ءجۇرۋدى ەركەكتىك ەرلىك سانايتىنمىن. <<ايلاس قاتىن مۇڭداس>> بولىپ، مەنىڭ وسى <<قاسيەتىمدى>> قالايتىن دوكەيىمدە  <<ءوزىڭ عانا ويناس تاپپاي، بىزبەندە <<توسەك باجا>> بولمايسىڭ با ؟>> دەپ سالماق سالاتىن. قولىندا ءمورى باردى تۇزاققا ءتۇسرۋدىڭ ورايى بولىپ كەلەتىن<<سۇلۋمەن شىرعالاۋ>> ءتاسىلىن مەن نەگە قولدانبايىن، وراتىن كەلتىرىپ دوكەيىمنىڭ تۇمسىعىن تالاي جىلى ومىراعا تىعىپ ،وسى شەبەرلىگىمنىڭ بوداۋىنا مەكەمەدە <<وزات جەكە>> بولىپ، كەۋدەمە گۇل قاداپ ،اقشالاي زاتتاي سيلانىپتا ءجۇردىم.
كوكتەم ايىنىڭ العاشقى كەزى.
كۇن التىن تاباقتاي جارقىراپ شىققان جايلى ءبىر كۇنى باسەكەڭ، جانە ورىنباسار باسەكەڭ ۇشەۋىمىز اۋداننان الىستاۋ ورنالاسقان <<جالعىز تام>> اۋىلىنا قىزمەت بابىمەن بارا قالدىق.
اۋىل باسشىلارى اۋدانعا جيىنعا كەتىپتى دە <<سورلىنىڭ قوناعى سير تۇستە كەلەدى>> دەگەندەي ءبىزدى اۋىلدىقتىڭ ۇنەمىلىك ىستەرىنە جاۋاپتى بولىپ جۇرەتىن سيدام سارى، تاپالداۋ كەلگەن تالعاتقان دەگەن جىگىت قارسى الدى. قول اياعى جەڭىل پىسىقشالاۋ ول ءبىر – ەكى قىستاقتى ارالاتىپ،ەگىنشىلەردىڭ بيىلعى ەگەتىن داقىلدارىنىڭ ءمان جايىنان دوكىلات بەرە ءجۇرىپ ، تۇسكى قوناعاسىمىزدى ءوز ۇيىنە ورنالاستىرىپ ۇلگىرىپتى.
_ اپىراي- ءا، نەسىنە اۋرە بولدىڭدار، قازىر نەگىزگى ساتى قىزمەتىنىڭ قاربالاس  مەزگىلى. اۋىلدىق اسحاناسىنان  كوجە –كولمەك ءىشىپ اتتانا سالساقتا بولدى ەمەسپە، _ دەپ  ەكى باسەكەڭدە رازى پەيىلىن ءبىلدىرىپ جاتىر.
جولشىباي << بۇگىن  اۋىلعا قونىپ  قاپ تۇبىندە قالعان ءبىر-ەر جىلىك بولسا اسقىزىپ، ەمەن- ەركىن سىلتەپ الايىق، ءتورت تامنىڭ ىشىنەن جالىعىپ كەتپەدىك پە>> دەپ سىلەكەيىن اعىزىپ كەلگەن ءبورى نيەتتەرىنىڭ بوتەن كورىنە قالعانىنا ىشىمنەن ساق- ساق كۇلىپ مەن تۇرمىن.
_ ءبىر كەلگەن قوناقسىزدار، حالىق ءۇشىن قىزمەت ىستەپ شارشاپ جۇرسىزدەر، سىزدەردى قۇر اۋىز جىبەرسەم ەرتەڭ اۋىلدىق باستىعى كەلگەندە مەنى سوكپەيمە. ءبىرنەشە جىگىت كەلىنشەكتەردى دە شاقىرىپ قويدىم، سىزدەردى كۇتەدى ولار._دەپ تالعاتقاندا جىلقى مايىنداي جىپ- جىپ ەتىپ، الدى ارتىمىزدى وراپ ءجۇر. تالعاتقاننىڭ << ءبىر كەلگەن دۇشپانسىزدار>> دەگەن ءسوزدى <<ءبىر كەلگەن قوناقسىزدار>> دەپ وزگەرتە قويعان شەبەرلىگىنە تاڭعالىپ<< تۇبىندە ءبىر ورىننىڭ دوكەيى بولىپ قالارسىڭ، اۋەلى ساعاندا شوپەر بولىپ جۇرەمىنبە كىم ءبىلسىن>> دەپ ىشىمنەن قىزعانا باعالاپ تۇرمىن.
قوناعاسى دۋماندى بولدى.
_ بيىل بيدايعا قاراعاندا ەكونوميكالىق داقىلداردىڭ باعاسى كورىم بولاتىن سەكىلدى، حانزۋ قىستاقتارىنداعى شارۋالار مايلى شەكىل، الابۇرشاقءوسىرىپ، اۋقاتتارىن وڭاپ ۇلگىردى. ءبىز سولاردىڭ ەڭبەككەر . قاجىرلى رۋحىن ۇيرەنۋىمىز كەرەك _ دەپ باسەكەڭ قىزمەت بابىمەن جۇرگەنىن بايقاتىپ نىعىزدالا سويلەپ وتىر.
_ بيىل بيداي ەگەتىندەر <<توقتامنان اسقانىنا سيلىق سوما بەرەدى>> دەپ دامەلەنبەسىن._ دەپ باسەكەڭنىڭ ءسوزىن تولىقتىرىپ قويدى ورىنباساردا .
_ دۇرىس ايتتىڭىز، <<جاقسى سويلەسە اۋزىنان گۇل توگىلەر >> دەگەن وسى._ دەپ ولارمەن قاتار ءتور الدىندا وتىرعان زەينەتكە شىققان بۇرىنعى اۋىلدىق باستىقتارىنىڭ ءبىرى ء نۇسىپ دەگەن كىسى <<اتتان تۇسسەدە، ۇزەڭگىدەن تۇسپەگەنىن>> ءبىلدىرىپ قويعىسى كەلگەندەي تالعاتقانعا_ ەستىدىڭ بە، مىنا كىسىلەردەن ۇيرەن، حالىققا باستاماشى بولۋدا باسشىلىقتىڭ شەبەرلىگى كەرەك. اتا باباسى<< قيىر قونىپ ، شەت جايلاپ، قىمىز ءىشىپ ەت شايناپ>> وسكەنءبىزدىڭ قازاق مال شارۋاشىلىعىنا  ماپانداي بولعانىمەن، ەگىن شارۋاشىلىعىنا وسالداۋ. مايلى شەكىل، الابۇرشاق، سارى بۇرشاق ەك دەسەڭ جەردەن كورە كەتەدى، <<ىقتىرماڭ بولماسا جەلگە وكپەلەمە، يقۋاتىڭ بولماسا جەرگە وكپەلەمە>> دەگەن ءسوز بار، جىگەرىڭ بولسا جەر انا بارىندە جارىلقايدى. سوندىقتان سەندەر قىستاقتاردى ارالاپ ، نەگىزگى ساتىدا بۇقاراعا قىزمەت ىستەۋلەرىڭ كەرەك_ دەپ نۇسقاۋ بەرە ءسوزىن دوعارىپ ەدى. ءالسىن- ءالى كەلىپ ءۇي يەسىنىڭ قۇلاعىنا سىبىرلاپ جۇرگەن جىڭىشكە مۇرتتى قىزىل شىرايلى جىگىت ءسوز تىزگىنىن ءىلىپ الا قويدى: _ قۇرمەتتى باسشىلار. قىمباتتى قوناقتار. قوش كەلدىڭىزدەر. الاقانداي اۋىلىمىزعا ات باسىن تىرەگەندەرىڭىز قىزمەتىمىزدى قولداپ قۋاتتاعاندارىڭىز دەپ بىلەمىز. مىنا تا شياڭجاڭ ۇكىمەتتىڭ كوزىنە ءىلىنىپ جۇرگەن حالىقشىل كادىرىمىزدىڭ ءبىرى، بۇگىن ارناۋلى وسى داستارقاندى جايىپ، <<ەسىڭە العان ادامىڭا ەسكى اسىڭنان ساقتا>> دەپ ءسۇرى جامباسىن اسىپ، سىرا اراعىن تاسىپ سىزدەرگە قوناعۋار پەيىلىمىزدى ءبىلدىرىپ وتىر، اش جۇرگەن جوقسىزدار، <<توق قوناق سيلارعا جاقسى>> دەگەن ەكەن، سول ءۇشىن الدارىڭىزداعى اراق سىرادان تارتىنباي الىپ قويۋلارىزدى تا شياڭجاڭ اتىنان ۇسىنىس ەتەمىن. قىزمەت كەڭسەدە ايتىلىپ، قىزىق وسىندا بولسىن.
وتىرعاندار <<و، بارەكەلدى>> ايتىسىپ ، ۇرەمكەلەر سىڭعىر ەتتى.
<< توردە وتىرعان ەسىكتەگىگە اساتادى>> دەگەندەي توردەگى ۇستەلدەگى دوكەيىم باستاعان <<يگى جاقسىلار>>ءبىزدىڭ ۇستەلگەدە ءجيى قاتىناپ توست كوتەرتىپ ءجۇر.
  تالعاتقاننىڭ  ءتورت  بولمەلى ەڭسەلى ۇيىندە قوس باستىعىممەن قوسا كۇتىلىپ وتىرعان مەنىڭ كوزىم قۋىرماش تاسىپ جۇرگەن ايەلدەردىڭ ىشىندەگى  <<اجارى ايداي سەزىلگەن>>اق قۇباشا كەلىنشەككە اۋا بەردى. جانىمدا وتىرعان اۋىلدىق جايىلىم باسقارۋ پونكيتىنىڭ جاۋاپتىسى بولىپ ىستەيتىن سەمىز سارىدان سۇراپ ۇقتىم.
كولدەنەڭ كوزدى جالت قاراتارلىق جامالى جانىما شوق تاستاپ ۇلگىرگەن <<پەريزاتىم>>اۋىلدىق وكىمەتتە  ىستەيتىن ءنازيا دەگەن ايەل ەكەن. قويۋ قارا شاشىن  توبەسىنە دومالاقتاپ ءتۇيىپ الىپتى، كەۋدەسىنەن  تىزەسىنە تۇتاسقان ۇساق گۇلدى قىزىل كويلەگى،  بيىك وكشەلى اياق كيىمىنە قۇپ جاراسىپ، وزگە ايەلدەردەن سۇڭعاق كورسەتىپ تۇر. اۋىلدا وسكەن بولسادا قاس كىرپىگىن سىزىپ، جۇقالاۋ ەرنىنە كۇرەڭ قىزىل بوياۋ جاعىپ، اپپاق موينىنا جاسىل تاستى تىزبەك القا تاعىپ الىپتى. ونىڭ ءوزى اجارىنا ءسان قوسىپ، وسىندا جۇرگەن وزگە ايەلدەردەن وقشاۋ كورسەتىپ، مەنەن باسقا ەركەكتەردىڭ دە موينىن ءبىر بۇرعىزىپ قويعانىن قۋ ءىشىم سەزىپ، قىزعانىشتىڭ قىزىل ءيتى جۇرەگىمدى جالاپ ءوتتى. <<و سەزىم ءتاڭىرىسى، باسقانى بىلمەيمىن، باسەكەڭنىڭ كوڭىلىن وعان اۋدىرا كورمە>> دەپ كۇبىرلەپ جىبەرگەنىمدى بىلمەي قالىپپىن. ابىروي بولعاندا ءبىر - بىرىنە ەسە بەرمەي وتىرعان شۋلى ورتاعا ءالسىز ءۇنىم جۇتىلىپ كەتىپتى. پاتشا سارايىنىڭ كانيزاكتارىنداي مايىسقان  ءنازيانىڭ بار ارەكەتى ماعان سونداي سۇيكىمدى، قىلىقتى سەزىلە بەردى. << مودى عا مويىن بۇرعىش سىلقىمسىڭ- اۋ>> دەيمىن ىشىمنەن.
ايەل قۇمار جىنى قوزا قالعان <<تۇلكى نيەتىمدى>> كوزىمنەن وقىدى ما، جوق سوزىمنەن وقىدى ما قاسىمدا وتىرعان سەمىز سارى پونكيت باستىعى : _ اي، ءنازيا، مىنا شوپەر ازاماتپەن ءبىر ۇرەمكە سوعىستىرمايسىڭ با ، جاڭىلماسام ءبىر جىلدىڭ ءتولى سەكىلدىسىڭدەر. بۇل جىگىت سەنەن كوزىن ايىرار ەمەس. مۇمكىن ەلەپ ەسكەرمەدى دەپ وكپەلەپ وتىرعان بولار_ دەدى ەڭكىلدەي كۇلىپ .
سەمىز سارىعا رازى بولعانىم سونشالىق، وڭاشالاۋ جەر بولسا تەرشىپ وتىرعان ماڭدايىنان جيركەنبەي ءسۇيىپ الار ەدىم.
ءنازيادا تارتىنعان جوق:
_ با ءزانجاڭ،  دەگەنىڭىز بولسىن، قالالىقتار دالالىقتى مەنسىنسە كورىم_ دەپ سىڭعىرلاي كۇلىپ كەلىپ ، ۇرەمكەنى قولىنا الدى  _ تانىسىپ قويايىق، اتىم ءنازيا، اۋىلدىقتا ىستەيمىن. اۋىلىمىزعا وزدەرىڭىزدەي قىمباتتى قوناقتار كەلگەن كەزدە ازداپ ىشەمىز، اراقكەش ايەل ەكەن دەپ ويلاپ قالماسسىز.
ونە بويىمنان ەلەكتر توگى وتكەندەي بولدى.
ورنىمان تۇرىپ  الدە بىرەۋلەر قوناعاسىنىڭ بۇلجىماس ءتارىبىنە اينالدىرىپ العان  قۇلدىق ۇرعان ادامنىڭ ۇرەمكەسىنىڭ ءتۇپ جاعىنان سوعىستىراتىن جاعىمپازداردىڭ سالتى بويىنشا ۇرەمەكەمدى نازيانىڭ ۇرەمكەسىنىڭ ەتەگىنەن تىق ەتكىزىپ: _ وزىڭدەي سۇلۋمەن تانىسقانىما باقىتتىمىن_دەپ ۇرەمكەمدى جۇتىپ جىبەرەردەي شالقايىپ تۇرىپ اۋزىما لاق ەتكىزدىم.
_ <<وزىڭدەي سۇلۋمەن تانىسقانىما باقىتتىمىن>> دەگەندى قىز كەزىمنەن ەستىپ كەلەمىن. ءسىز سونىڭ توقسان توعىزى شىعارسىز._ دەپ نازيا سىڭعىرلاي كۇلىپ، بۇراتىلا باسىپ ، باستىقتار وتىرعان ۇستەلگە قاراي ءجۇرىپ كەتتى.
ءسامبى تالداي ءساندى تۇلعاعا وبىرلانا قاراپ قالعان مەنى ءتۇرتىپ <<وياتقان>> سەمىز سارى پونكيت باستىعى:
_ بۇل  سۇلۋدى تاقاڭمەن ءتاۋىر دەپ ءجۇر،<<قىزعا قىرىق جىگىت >>بولسا ،<< ايەلگە الپىس ەركەك>>  دەگەن.جىگىتىم ساعان دا كەت ارى ەمەس سەكىلدى، ەركەكسىرەپ جۇرگەن كەزى، بۇگىنگى ورايدى جىبەرمە_ دەپ سىبىرلادى.
ونىڭ تەمەكسىنىڭ ءتۇتىنى كوزىمدى اشىتىپ جىبەرسەدە سىعىرايا قاراپ: ەرجىگىتپىز ەمەسپە_دەدىم.
قوناعاسىنىڭ سوڭى ءان مەن بيگە اۋىسقاندا ءنازيانى  بىر نەشە رەت بيگە تارتتىم.
<< كوزىڭ كورمەسە، كوڭىلىڭ تىلەمەس.  كوزىڭ كورىپ قالسا، كوڭىل اۋىۋى تۇك ەمەس >> دەگەندەي كوزىمە وتتاي  باسىلعان جاس ايەلگە اينالدىرعان اۋرۋداي جابىسىپ الدىم.
_<<جاقسى دا جاتتىق جوق>> دەگەن. ءسىزدى ۇناتىپ قالدىم_ دەيمىن ۋاليس ءبيىنە تەربەتىپ ءجۇرىپ.
_ وزىڭدى كورگەندە ماحابباتتان دا ارتىق ءبىر سەزىم بولاتىنىن تۇيسىندىم_ دەپ سىبىرلايمىن<<ۇسىل>> ءبيىن بيلەپ ءجۇرىپ.
_<<قارا جورعا بولماسا ،
ءبيدىڭ ءسانى كەلەمە>>
وزىڭدەي سۇلۋ بولماسا،
اۋىل ءسانى كەلەمە._ دەيمىن <<قارا جورعا>> بيىنە ارەكەتىم كەلمەسەدە وق تيگەن قارا قۇستاي جالپىلداپ،
_ سىرتقا شىعايىق_دەيمىن كوزىممەن يشاراتتاپ ۇزدىگىپ.
_ قويىڭىزشى، نەدەگەن سەزىم، ءبىر كورە قالعاندا كۇيە قالعان، _ دەپ ءنازيادا سىبىرلاپ، ءبي مۋزيكاسىنا ەلىتكەندەي كوزىن جۇمىپ، جەڭىل تەربەلەدى. كەيدە ماعان جابىسا قالىپ ، ەكى انارىن كەۋدەمە بىلق ەتكىزەدى دە قايتادان اجىراپ شىر كوبەلەك اينالادى.  سول ساتتە دەنەمدەگى جىبىرلاپ جۇرگەن ءناپسى قۇرتى ءبىر اراعان جينالا قالىپ، كەۋدەمنەن باستاپ ەكى سانىما دەيىن شىمىرلاپ  ونىڭ جەڭىل دەنەسىن وزىمە قاپسىرا  تارتامىن.
_ قويىڭىز، باسقالار بايقاپ قالسا ۇيات بولادى. ءوزىڭىز  ءبىر قىزىق ادام ەكەنسىز.._ دەيدى نازيادا ءجۇزى الاۋلاپ. ءبىر ءتاۋىرى قوناقتار شارىقتاۋ شەگىنە جەتىپ العان. مەنىڭ <<ۇلكەن دوكەيىم>>ءتور الدىناعى سۇپىعا سۇلاپ تۇسكەندە ، << كىشى دوكەيىم>> تالعاتقاننىڭ موينىنان قۇشاقتاپ الدە بىردەڭەسىن ايتىپ جاتىر. سەمىز سارى پونكيت باستىعى دا ءبىر جىگىتپەن قول بۇراسىپ، باستەسىپ اراق ءىشىپ وتىر. باسقا قوناقتاردا ءوز الدىنا مارە-سارە.
_بۇگىن وزىڭمەن سىرلاسقىم كەلىپ تۇر.  
_ ءسىز ۇيلەنگەنبە ەدىڭىز؟
_ ۇيلەندى دەسەڭدە، ۇيلەنبەدى دەسەڭدە بولادى.
وزگە ايەل زاتىن شىرعالاۋدا ءوز شۇيكە باسىن جامانداي جونەلەتىن ەركەكتەردىڭ ەكى امالىنىڭ ءبىرى ەمەسپە ، سونى قولداندىم.
_ جۇمباق جاسىرىپ تۇرعانداي مىنا ءسوزىڭىز قىزىق ەكەن.
_<<سۇيمەي العان سۇلۋدان، ءسۇيىپ العان سۋ مۇرىن ارتىق>> دەگەندى بىلمەيسىڭ بە جانىم.
_ سۇلۋ قۇشىپ ءجۇرىپ، سۋ مۇرىن ىزدەگەن  سىزدە قىزىق ەكەنسىز.
_ امال نە،  بويداق كەزىم بولسا ماحاببات قۇرىعىن وزىڭە سىلتەيدى ەكەنمىن جانىم.
_ جانىم دەمەڭىزشى ، ۇيدەگى جەڭگەمىزگە عانا مەشىكتى ءسوزدى ماعان  قولدانساڭىز ىڭعايسىزدانادى ەكەمىن.
_ ءوزىڭدى كورىپ ۇيلەنگەنىمە وكىنىپ تۇرمىن .
_ پو، مەنى كىم دەپ ويلاپ تۇرسىز؟
_ سەن مەنىڭ ومىرىمدە كەزىككەن ەڭ سۇلۋ ەڭ اقىلدى ايەل زاتىسىڭ.
_ ايەل زاتىن ءبىر كورگەندە زەرتتەي قوياتىن <<ماحابببات مامانى>> ۇقسامايسىزبا. قى..قى..وندا ايتىڭىزشى، سۇلۋلىق جاعىنان قاي ۇلتتىڭ ايەلى الدا تۇرادى؟
ءنازيا كۇلگەندە بەتىندەگى ءسۇت شۇڭقىرى سۇيكىمدىلىگىن ءتىپتى دە اسىرىپ جىبەرەتىنىن بايقادىم.
ايەل زاتىن شىرعالاۋدىڭ ءبىر ءتاسىلى ءازىل ەمەسپە. <<ويپاڭدى جەرگە ەگىن سالما، ويناقى ايەلگە كوزىڭ سالما>> دەپ قازاق بەكەر ايتاما. ويناقى ايەل- ءازىلقوي كەلەدى. ءنازيادا ءازىل قۇمار ەكەنى ءبىلىنىپ تۇر.ال ءازىل كەيدە ازەزىل نيەتىڭنىڭ جولىن سالادى. بۇل مەنىڭ ايەل ارباۋداعى ەكىنشى تاكتيكام.
ونىڭ سۇراۋىنا ءازىل ارلاستىرا جاۋاپ بەردىم.
_ قازاق ايەلدەرىنىڭ جامالى سۇلۋ، ۇيعىر ايەلدەرىنىڭ جانارى سۇلۋ. حانزۋ ايەلدەرىنىڭ دەنەسى سۇلۋ، ورىس ايەلدەرىنىڭ كەۋدەسى سۇلۋ. كورەي ايەلدەرىنىڭ كۇلكىسى سۇلۋ، ءيندى ايەلدەرىنىڭ كىرپىگى سۇلۋ، نەگىر ايەلىنىڭ اۋزى سۇلۋ بولادى ەكەن .
_نەدەگەن زەرتتەگەنسىز. بىراق نەگىر ايەلىنىڭ اۋزى سۇلۋ دەگەنىڭىزءسال..
_ نەسى ءسال؟ ناقتاپ بايقاعان ادامعا  نەگىر ايەلدەرىنىڭ ەرنىنىڭ ەرنەۋى جالپاق كەلەدى دە ، اتەيلەپ قالىڭداتىپ سىزىپ قويعانداي جىلتىر قارا وڭىنە جاراسىپ،ءبىر ءتۇرلى سۇيكىمدى كەلەدى، سۇلۋلىق ءبىر ايەلگە تۇراقتامايدى. <<كۇن كوزىندەدە داق بولاتىنى >>سەكىلدى سۇلۋلاردىڭ دا ءبىر جەرىندە ءمىن بولادى. ەندەشە سۇلۋلىق دەگەن نە؟ مەنشە ءوزىڭ ۇناتقان ايەلدەردىڭ بويىندا ءبىر سۇيكىمدىلىك  بايقالسا ، سۇلۋلىق دەگەن سول. سەندەدە مەنى ىڭكار ەتكەن ءبىر سۇيكىمدىلىك بار.
_ ول قانداي سۇيكىمدىلىك؟
_ ايتا المايمىن.  مەن ايتقان بار سۇلۋلىق سەنىڭ بويىڭنان مۇندالاپ تۇرعانداي سەزىلە بەرەدى..
_ راقىمەت  ءا..
_ سەنى ۇناتىپ قالعانىم سونشالىق جىنداناتىن سياقتىمىن.
_مايعا وراعانداي مايدا ءسوزىڭىزدىڭ شىن ەكەنىن قالاي دالەلدەي الاسىز؟
_ جۇرەگىممەن دالەلدەي الامىن.
_ وندا جۇرەگىڭىزدى الىپ شىعىڭىزشى كورەيىن قى...قى..
_ كورسەتەيىن، دالاعا شىعايىق، مىنا اراق ءيسىمەن تەمەكى ءتۇتىنى تورلاعان جەردە جۇرەگىمدى قايتىپ الىپ شىعام. سەسكەنەدى ەمەسپە..ەح...ەح.. اي جۇلدىزداردىڭ اق ساۋلەسى  استىندا جان سىرىمدى بىراق اقتارعىم كەلىپ تۇر.؟
_ ۇيباي-اۋ ، انا جۇرگەن جەڭىل اۋىز ايەلدەر ەرتەڭ اۋىل گازەتىنىڭ ءبىرىنشى بەتىنە شىعارا قويسىن. <<مۇگەدەك كۇيەۋىن مەنسىنبەي، تاعى ءبىر ەركەك تاۋىپ الىپتى>> دەپ...قى..قى،،
نازيانىڭ كۇيەۋى ءۇيىر-ءۇيىر جىلقىسى مەن قورا قورا قويى بار اۋقاتتى شاڭىراقتىڭ كەنجە ۇلى ەكەن دە،  باي قايىن اتاسى ءنازياعا ىشتاتتى ساتىپ الىپ بەرىپ، اۋىلدىقتىڭ جۇمىسشىسى ەتىپ ورنالاستىرىپتى. ءبىر جىلدىڭ الدىندا كۇيەۋى مال جوتكەپ ءجۇرىپ، ماشينا شىرعالاڭىنا جولىعىپ، اقشانىڭ كۇشىمەن جانى ارەڭ قالىپ، جانسار ادامعا اينالىپ قالعان ەكەن.
_ سىزگە وبال بولعان ەكەن _ دەيمىن ونى اياعان الپەتىمدى ءبىلدىرىپ.،
ءوڭىم تۇنجىراي قالعانىمەن ىشكى الەمىم<<  ماعان ەركەكسىرەپ ەتەگى جەلپىلدەپ جۇرگەن سەندەي ايەل كەرەك>> دەپ ساق-ساق كۇلەدى.
_ امال جوق، تاعدىر باسقا سالعان سوڭ كونەسىڭ ەكەن.
_ تاعدىردى جەڭۋ كەرەك ؟
_ ايتۋعا وڭاي عوي، قالاي جەڭەمىن.
ايەل زاتىنىڭ ءالسىز جەرىن اڭدۋعا جاتىلىپ العان ەجەلگى ايلامدى ىسكە قوسۋدىڭ قولايلى كەزى كەلگەنىن اڭعارا قالعان اقىلىم << ەندى شابۋىلعا ءوت>> دەگەن سەگىنالىن شالعانداي بولدى.
_ كىم ەتەگىنە ناماز وقىپ ءجۇر دەيسىڭ. بۇل ءومىر _ ەرتەڭ جانىپ تاۋسىلاتىن كومىر. جاستىق ءومىرىڭدى قور قىلىپ ءجۇر ەكەنسىڭ.
_ سىزشە بولعاندا ساۋ كەزىندە ءسۇيىپ تيگەن كۇيەۋىمدى مۇگەدەك بولعاندا دالاعا تاستاعانىم تۋرا بولدى عوي. ونداي وپاسسىزدىققا بارۋدان ساقتاسىن.
_ ولاي دەپ ويلاي كورمە،ونى باعۋىڭ ساۋاپ، بىراق ءوزىڭدى دە ويلا، ءتۇن بويى قۇر كورپەنى قۇشاقتاپ جاتۋدا سەندەي جاس ايەلگە مىناسىپ ەمەس. تۇنجىراي قلدىڭ عوي. رەنجىتىپ الدىم با ؟ اسىپ سويلەسەم ايىپقا بۇيىر كورمە.. ساعان راسىندا جانىم اشىپ تۇر.
ءنازيانىڭ كىرپىگىنە كىرەۋكە مۇڭ ىلىنگەنىن   بايقاي قويدىم.
_ شىندىق عوي- دەپ ول مەنەن كوزىن تايدىرىپ.
بۇل جولى باتىلدانا ءتۇستىم.
_شىن ايتىپ تۇرمىن، ءنازياجان، مەن سەنى ۇناتىپ قالدىم. وزىڭە ەمەشەگى ءۇزىلگەلى تۇرعان مەندەي ەر ازاماتتىڭ بەتىن قاقساڭ ەرتەڭ وكىنەسىڭ.....
ولءۇنسىز قالدى. مەن ونىڭ بەلىنەن ۇستاعان قولىمدى وزىمە قاراي تارتا ءتۇستىم. ءبي مۋزيكاسى تۇگەۋگە تاياعان مەزەتتە عانا ءنازيادان ءسوز شىقتى، ۇنىندە ءدىرىل بار.
_ ءالى تالاي كەزىگەرمىز، بۇگىن سابىرلى بولىڭىز.بۇل ارادا كۇيەۋىمنىڭ تۋىستارى ءجۇر.
<<ەنەڭدى دەگەندى ەمەۋىرىنەن>> دەگەندەي ءنازيانىڭ ەكى اۋىز لەبىزىنەن كەت ارى ەمەسىن بايقادىم. <<اشىعا شىرعالاعان قويداي>> ايلامدى اسىرعان ەرلىگىمە ءسۇيىنىپ، ءبىر – ەكى ۇرەمكەنى ارتىعىراق سىلتەپ جىبەرىپپىن.
ەندى ۋاقىتتى سوزباۋ كەرەك!
_ەي، سەن..ءيت نەمە... بايقاپ ءىش، قايتاتىن بولىپ جاتساق ماشينانى...كى.. كىم جۇرگىزەدى..؟_ دەپ تۇساۋىن كەسكەن بالاداي بولىپ ءوزىن ارەڭ مەڭگەرىپ تۇرعان << كىشى دوكەيىمە>>_ <<شوشقاعادا ءبىر كۇن مەيرام>> دەگەن، الاڭسىز بولىڭىز، قانشا ىشسەمدە رولدان كەتپەيمىن._ دەپ كەۋدەمدى قاقتىم.
*         *         *         *        
بۇگىن جالعىز تال اۋىلىنا جالعىز اتتانىپ كەلەمىن. كۇن بۇلتتاپ ازداپ جاڭبىر جاۋعان. جاڭبىردان كەيىنگى جازعى دالانىىڭ اجارى اشىلىپ، ماشينا تەرەزەسىنەن ءبىر ءتۇرلى جاعىمدى ءيس تاناۋىما ۇرىلىپ ، كوڭىلدى كەلەمىن
<<كەلەسى سەنبى كۇنى كۇيەۋىمدى اعالارى تاۋعا الىپ كەتەدى، سەن جەكسەنبى كۇنى كەل. ءبىزدىڭ ءۇي اۋىلدىقتىڭ ارتقى جاعىندا.  وشكىن كوك سىرمەن سىرلانعان تەمىر قاقپاسى بار. ۋادەلى ۋاقىتتا كەزىگەيىك>>- دەگەن ءنازيانىڭ سۇلۋ ديدارى كوز الدىمە ەلەستەگەن سايىن الدا قۇشار<< باقىتىما >>اسىعىپ كەلەمىن. ساسىعان ەتتىڭ ءيسىن  الىستان سەزەتىن شىبىن تۇيسىگىم الداماپتى.
<< اينالدىرعان اۋرۋ الماي قويمايدى>> دەگەندەي مەنىڭ تۇزاعىمنان ءنازيادا <<قۇتىلا المادى>>. مەندە نازياداي سۇلۋ قۇستى قولىما قوندىرۋعا از بوداۋ بەرمەدىم.
بۇندايدا ەركەك اعزاسىمەن اقىلىنىڭ قانداي كۇي كەشەرىن ايەل ويناپ جۇرگەن سەرى ماستار سەزە الار. كوز الدىمدا قوس الماسى ءدىر دىر ەتىپ شالقالاي قۇلاپ بارا جاتقان ءنازيا سۇلۋ ەلەستەسە ، بىردە الدە بىردەڭەنى سەزەتىندەي ايەلىمنىڭ مۇڭايىڭقى جانارى ەلەستەيدى.
اتتانار الدىندا _ كيىمدەرىڭدى اۋىستىرىپ ال، ماي ساسىپ كەتىپتى، جۋىپ قويايىن، مىنا كيىمىڭدى كي، ۇتىكتەپ قويعامىن.- دەپ باسىمنان باقايشىعىما دەيىن جاڭالاپ قويا بەرىپ ەدى بەيشارا جەلەكتىم..
كۇنالى ىسكە كۇتىمدەپ جۇمساعانداي بولعان ول سورلىنى دا اياپ كەتتىم. باياعى دا ۋازىرىنىڭ ايەلىنە كوزى تۇسكەن ءبىر پاتشانىڭ نيەتى قابىنىپ، ءۋازىرىن شەت ايماقتاردىڭ بىرىنە سالىق جۇمىسىن تەكتەۋگە جۇمساپ جىبەرىپ، ەركەك شابىتى قوزىپ،ءۋازىردىڭ ۇيىنە بارىپتى دەيدى، وت بوپ كەلگەن پاتشانىڭ جالىنىنا شارپىلماي تۇرىپ ءبىر امالىن تابۋدى ويلاعان اقىلدى ايەل پاتشاعا_ الدىمەن  تاماققا سىرەي تويىپ ،شاراپتان مولداپ سىلتەپ الساڭىز. توسەككە شىققاندا رۋحتى كەلەسىز،<<ىشسەڭ شاراپ باعالى، لازاتتىڭ دابىلىن قاعادى>> دەگەن شايىرلاردىڭ جىرى بار ەمەسپە ، مەن تاماق شاراپ ازىرلەيىن،ءسىز وتىرا تۇرىڭىز_ دەپ قولىنا ءبىر ەسكى زامان كىتابىن ۇستاتىپ كەتەدى. كىتاپتا جىنىستىق اۋەيىلىكتىڭ زاردابى  تۋرالى جازىلعان ەكەن.
كوپ ۇزاماي تاماقتا ءازىر بولادى.
پاتشا داستارقانداعى قىزىل ءتۇستى، جاسىل تۇستى، كوك تۇستى، قوڭىر ءتۇستى ،سارى ءتۇستى ءتۇرلى رەڭدەگى جۇمىرتقالارعا تاڭعالىپ ءار بىرىنەن بىردەن تاتىپ كورەدى دە:_ وۋ، جانىم. مىنانىڭ ءتۇرى بولەك بولعانىمەن ءدامى بىردەي عوي_ دەيدى. سوندا ۋازىردىڭ حانىمى:_ ە، قۇدىرەتتى حان يەم، سىزدە ءتۇرى بولەك، لازاتى ءبىر ايەل زاتى ءۇشىن كەلىپ وتىرسىز ەمەسپە_ دەگەن ەكەن، ءسوزدەن ۇتىلىپ، ۇياتى ويانعان پاتشا ايەلگە جولاماي تىزگىن ۇشىمەن ورداسىنا قايتقان ەكەن دەيدى.
بىراق ءنازيا ءۋازىردىڭ ايەلىندەي ەمەس ەكەن.
ال مەنشى سۇلۋ كورسە سۇقتانۋدى ەرلىك سانايتىن ەركەكتىڭ ءبىرىمىن عوي. ءتۇر-ءتۇسى بولەك بولسادا لازاتى بىردەي بوگدە ايەل زاتى ءۇشىن قالادان شالعايداعى اۋىلعا <<ءولدىم-تالدىم>>ۇشىرتىپ كەلەمىن. <<بىرەۋدىكى بىرەۋگە قىزداي كورىنىپتى>> دەپ قاي قۋ اۋىز قازاق ايتتى ەكەن.
كوز الدىما بىردە<<كەلشى جانىم..>> دەپ نازدانا ءنازيا ەلەستەيدى، بىردە << قاشان قايتاسىڭ؟ جولدا ابايلا، بىردەڭەگە سوعىلىپ قالىپ جۇرمە>> دەپ جانارى مولدىرەپ بەيشارا ايەلىم، نەكەلى جارىم ەلەستەيدى.
_ جوق، سەن باقىر باستى ەركەكسىڭ، باياعى دا اتا- باباڭدا بايبىشە، توقال ، ۇلكەن توقال، كىشى توقال دەپ بەس التىدان ايەل قىزىعىن كورگەن، بوساما، ايەل ەردىڭ لازات كولشىگى، شومىلىپ ال...
<<توبىلعى تورى سىرانى
، تولتىرا ىشكەن كۇن قايدا.
توبىلعى تورى قىزداردى،
شالقايتا قۇشقان كۇن قايدا – دەپ ءبىر اقىننىڭ جىرىنا ايتىلعانداي ەرتەڭ قاۋساعان شال بولىپ،ءبارى ارمانعا اينالىپ، كۇلدەي توزعانىن بىلگەندە بىلتەلەپ ساقالىڭدى جۇلعانىمەن نە پايدا؟! ەركەك ايەلدى قۇشۋعا جارالعان. _ دەيدى سايتاني رۋحىم.
ءنازيادا ارەڭ وتىرعان ەكەن. قاقپادان باسىن قىلتيتىپ ماڭايىن بارلاپ الدى دا، ىشىنەن تەمىر تۇتقانى مىقتاپ بەكىتتى.
اراسىندا نازيانىڭ سارىمساق قوسىپ جۇمىرتقا قۋىرىپ اكەلگەنىن، داستارقاندا وتىرىپ بىراز اراق ىشكەنىمىزدى، ءنازيا ورتالاۋ مەكتەپتى شالا- شارپى بىتىرگەنەن سوڭ، ءۇيىنىڭ جاعدايىمەن وقۋدان قول ۇزگەنىن، قىز كەزىندە بەت بىتكەننىڭ سۇلۋى بولعانىن، كەيىن بايلىقتارىنا قىزىعىپ وسى كۇيەۋىنە قاشىپ تيگەنىن ، ەندى سورلاپ اۋرۋ كۇيەۋ باعىپ جاتقانىن اڭگىمەلەگەنىن ، مەنى جاتىن ۇيگە كىرگىزگەنىن، اۋىز ۇيگە بارىپ  سۋعا قۇيىنىپ كەلگەنىن قىرتىپ ، وقىرماندى جالىقتىرعىم كەلمەيدى..
ءنازيا بۇگىن كويلەك كيمەپتى، ەتىمەن جابىستىرىپ بۇتىمەن بۇت ەتىپ كيگەن جۇقا شالبارىنان بوكسەسى بۇلتيىپ ، ونسىزدا ارەڭ شىداپ وتىرعان مەنى لاۋلاعان وتقا يتەرىپ جىبەرگەندەي بولعان ەدى.
ەكى ادامدىق قۇس توسەكتە انادان تۋعانداي بولىپ شەشىنىپ، قىزىل تورعىن تىستى كورپەنى جامىلىپ جاتىپ، ءنازيانى تاعاتسىزدانا كۇتۋدەمىن.
ءبىر كەزدە بۇل توسەكتە مەن سەكىلدى جالاڭاشتانىپ الىپ سۇتتەن اق، سۋدان تازا ارۋ ءنازيانى ، ەندى عانا جەلەك جامىلعان نەكەلى جارىن كۇتىپ مۇگەدەك كۇيەۋى دە جاتتى-اۋ .
_ نەسىنە تارتىناسىڭ_ دەيدى سايتاني رۋحىم ساق-ساق كۇلىپ_ عۇسىلىڭدى جۇقتىرىپ كەتكەن كوپ توسەكتىڭ ءبىرى ەمەسپە بۇل.
ءنازيا كەۋدە كيىمدەرىن شەشە باستاعاندا بايقاعانىم ومىراۋى وزگە ايەلدەردەي سالپيماي جەل ۇرعانداي تىرسيىپ تىكىرەيىپ تۇرادى ەكەن.  
ول سۋلانعان شاشىن تارقاتىپ، سىلكىگەندە اينالاعا ءمولدىر مەرۋەتتەر شاشىلعانداي ...نە ويلادى ەكەن، كەم ۋاقىت ويعا شومىپ تۇرىپ، تەرەڭ تىنىس الدى، ەرتەكتەردە ايتىلاتىن اققۋ بولىپ ۇشىپ كەلىپ كولگە شومىلىپ قايتقان پەرى قىزدارىنىڭ ىشىندەگى قاسيەتتى كيىمىنەن ايرىلىپ جاعادا تۇرىپ قالعان  ەڭ سۇلۋىن قوعالى قامىس اراسىنان  باسپالاعان تاقىر كەدەيدىڭ تالەيلى ۇلىنداي كۇيىپ-جانىپ << تەز كەلسەشى>> دەپ جۇتىنىپ مەن جاتىرمىن. الا كولەڭكە ءۇي ىشىندە اۋا اعىسىمەن ەكى ادامنىڭ دەم الىسىنان باسقا لام دىبىس جوق. ءنازيا القا، جۇزىك شاش قىستىرعىلارىن بىردەن- بىردەن ۇستەل ۇستىنە قويدى دا، لىپاسىز جالاڭاش ەتىن جارق ەتكىزىپ، قوينىما  سۇڭگىپ كەتتى.
وتتاي جانعان ەكى دەنە جابىستىق تا قالدىق.
قولتىعى تۇسىندا  از بوگدە ءيس بولعانىمەن تاماعىنىڭ استىنان ساعز كامپيتتىڭ ءيسىنە ۇقسايتىن ءبىر تۇرلى جۇپارءيس بۇرقىراپ، قىز سيپاتىن كەتىرە قويماعان شىنار تۇلعاسى مەن كورگەن وزگە ايەلدەردەن وقشاۋ كوركەمدىك بوپ كوزىمە ۇرىلدى.
كورپەنى سەرپە تەۋىپ ، ورنىمان اتىپ تۇرىپ، ونى شالقاسىنان جاتقىزىپ، ايمالاي باستادىم.
<<سارى لەنتانىڭ>> سان ءتۇرىن كورىپ جۇرگەن مەكەرلىگىمدى ايەل دەنەسى سۇيسىنە قابىلداپ، قايرانعا شىققان اق شاباقتاي اۋناقشيدى.
اق ۇلپاداي جۇمساق، مايدا ايەل دەنەسىنە قۇرالايدى جۇمارلاعان جولبارىسشا   اشقاراقتانعان مەنىڭ ەسىرگەن ءناپسى ۇستەمدىگىم ۇدەي ءتۇستى.
بەينە <<مىڭ ءبىر تۇندەگى>> مىنا جىر جولدارىندا  ايتىلعانداي لازات قۇشاعىنا قۇلاي بەردىم.
جولىعىپ قاس سۇلۋعا كوڭىل قالاپ،
الدىڭدا سۇيسەڭ سۇلۋ، جۇتساڭ شاراپ.
الماداي قۇشاعىندا ءيسىندىرىپ،
اق بەتىن القىمىڭا تۇرسا جاناپ..

پىسىرىپ باقتىڭ ۇزگەن انارىنداي،
ەشبىر زات ونان ءتاتتى سانالىنباي.
الدىڭدا سۇيسەڭ سۇلۋ جۇتساڭ شاراپ،
قالارما ءومىرىڭنىڭ ءنارى الىنباي!
وسى كەزدە الدە بىردەڭە كورپەمىزدى تىرمالاعنداي بولدى.
-        بەتىم- اۋ ، مىناۋ قاشان ويانىپ العان!
ءنازيا ساسقالاقتاپ باسىن كوتەرمەك بولىپ ەدى ، مەنىڭ توسەك ەرنەۋىنە تىرەپ تۇرعان قولىم ءبىر ءورىم شاشىن باسىپ الىپتى.
_ نە بولدى؟
سوندا بايقادىم.  توسەكتىڭ ەرنەۋىندە ماعان جاۋدىراي قاراپ قارا دومالاق بالا تۇر.
  _ بۇل مەنىڭ ۇلىم... ەرعۇلان.. بيىل ەكى جاسقا شىعادى... قارسى ۇيگە ۇيىقتاتىپ قويىپ ەدىم، ويانىپ الىپتى عوي، ەشتەڭە ەتپەيدى، بالا ەمەسپە،  بارا عوي ەكىش، ە،،ە،،،ويناي عوي...ايەي بوپام...انا ۇيدە ويىنشىق بار
ەرعۇلان كىشكەنە قولدارىمەن شەشەسىن تۇرعىزعىسى كەلىپ، جانتالاسادى، كەيدە  توسەك ەرنەۋىنە اسىلىپ مەنىڭ ءجۇن باسقان سانىمدى تىرمالايدى. بىلدىر –بىلدىر ەتەدى. كەيدە تۇرا قالىپ ماعان تىگىلە قارايدى، ءتاتتى لازاتتىڭ تۇتقىنىنا اينالعان شەشەسى ونى ەلەر ەمەس، <<انا جەرگە بارىپ ويناي عوي. كەت دەيمىن>> دەپ  قولىمەن ونى يتەرىپ، مەنى وزىنە قاپسىرا تارتادى. ەنتىگە ىڭىرسيدى،  بالاسى كەتەر ەمەس، ول بارىندە سەزىپ تۇرعان سەكىلدى. تانتىرەكتەي باسىپ شەشەسىنىڭ باسى جاعىنا بارادى دا قايتادان توسەكتىڭ ەرنەۋىنە كەلىپ ،بىلدىر بىلدىر تىلىمەن ماعان الدە بىردەڭە دەگەندەي قاراپ تۇرا قالادى. دەنەسىن بيلەي الماي قۇيرىعىمەن وتىرا جىعىلىپ ، توسەكتىڭ سيراعىنا تىرمىسا جارماسىپ تۇرىپ الادى دا شالقادان جاتقان شەشەسىنە ،ات ۇستىندەگى ادامداي بولىپ شەشەسىنىڭ ۇستىندە قوقيىپ وتىرعان ماعان كەزەك – كەزەك قاراعانداعى جانارىن سوزبەن سۋرەتتەۋ قيىن. ونىڭ جانارىنىڭ تۇبىنەن تاعى ءبىر كوز تۇنەرە قاراپ تۇرعانداي ەلەستەدى، سونداي وتتى كوز، سونداي قاقارلى كوز،  <<و، تاۋبا، ءسابيدىڭ بويىندا پەرىشتەسى بولادى دەۋشى ەدى، كۇنا شىمىلدىعىن سىرعان بىزگە جيركەنە قاراپ تۇعان سول پەرىشتەسى مە ەكەن؟!>> <<الاھ تاعالا نىڭ ون سەگز مىڭ عالامدى  تارىنىڭ قاۋىزىنا سيدىردىم دەپ ادامعالايسالامعا سيلاعان نيعىمەتتەرىنىڭ ءبىرى وسى كوز. كوز كوڭىلدىڭ ايناسى. كوز سۇعى قيىن بولادى قارعام، كوزگە كوپ تۇسە بەرمە، ەلدىڭ الدى دا، ارتى دا بولماي ورتاسىندا جۇرە بەر>> دەپ وتىرۋشى ەدى مارحۇم اجەم.  ادام ولتىرگەن قاندى قولدىڭ بەينەسى قينالىپ جان تاپسىرعان ولىكتىڭ جانارىندا ساقتالىپ قالادى ەكەن، سوندىقتان ولتىرگەن ادامنىڭ كوزىن ويىپ اكەتەدى ەكەن دەپ ەستيتىنبىز. ال ماعان تىگىلىپ تۇرعان جانار ومىردەگى قياناتتىڭ قىلپىن ءالى كورمەگەن، ۇلى تاۋ قويناۋىنان جاڭا عانا جارىپ شىققان باستاۋداي مولدىر، تازا ، تۇنىق جانار ەدى. بۇگىن ول... كىناسىزءسابي جانارىنا تۇڭعىش كۇنالى تىرلىكتىڭ تۇمانىن تۇسىرگەن مەنىڭ دەنەم تىتىركەنىپ كەتتى. قاراۋعا باتىنا الماي كوزىمدى تايدىرىپ اكەتتىم.  كەزىندە ءبىر كىتاپتان<<توسەك تىراگەدياسىنان جامان تىراگەديا جوق>> دەگەندى وقىعان ەدىم. ايەل دەنەسىنىڭ لازاتىن سورىپ بولىپ، اۋناپ ءتۇسىپ تەرىس قاراپ جاتا قالاتىن كەزىمە ۇقسامايتىن جيرەنۋ ەدى بۇل. نەدەن جيرەندىم؟
ءنازيا كەۋدەمنەن اياعىمەن اقىرىن ىيتەرىپ :_ بۇقاداي بولىپ بۇزىپ جارىپ جەتكەندەگى شاماڭ وسى ما؟ << وتى جوق جىگىت وتىزىندا شال بولار>>. بولدى وندا ، توقتاتايىق، ەركەك قۇشاعىن كورمەگەلى ءبىر جىلدان اسىپ ەدى، قۇداي كەشسىن ..ءبۇيتىپ كۇنالى  قىلىپ،  ەتەگىمدى تۇرگەنىڭ قۇرىسىن._ دەپ بۇرتيا تۇرەگەلدى، نامىسىم قوزىپ بارادى. بىراق ماعان ءالى ءتىگىلە قاراپ تۇرعان  بالانىڭ جانارى بويىمداعى بار قۋاتتى سورىپ العانداي. سول ءسابي جانارى ءبىر قاۋىم ۋاقىت ەسىمنەن شىقپاي، كەيدە تۇسىمنەن شوشىپ ويانىپ ءجۇردىم.
راسىندا  سول بولعانى ما!
ەكى  ايدان كەيىن ەرعۇلاننىڭ ۇستىنەن سوت اشىلدى، سوت اشىلاتىن كۇنى مەنىڭ قان قىسىمىم ورلەپ شيپاحاناعا جاتىپ قالدىم.




5

تاقىرىپ

2

دوس

1510

ءنومىر

اعا بۋىن مۇشە

Rank: 6Rank: 6

جولدانعان ۋاقىتى 2016-1-7 17:40:59 |بارلىق قاباتتى كورسەتۋ
«اتاڭا نە قىلساڭ، الدىڭا سول كەلەدى. » ، «بىرەۋگە قازعان ورنا ، ءوزى تۇسىپتى» دەگەندى ءبىر قىرنان بەينەلەگەن تاماشا شىعارما دەپ باعالادىم.

كوڭلدى كۇندەر بولعاي.

9

تاقىرىپ

11

دوس

751

ءنومىر

تەتە مۇشە

Rank: 4

جولدانعان ۋاقىتى 2016-1-11 16:10:13 |بارلىق قاباتتى كورسەتۋ
جەكە قالامىڭا قارىم، تاماشا شىعارما.

ءسىز تىركەلگەننەن كەيىن جاۋاپ جازا الاسىز تىركەلۋ | تىزىمدەلىڭىز


Archiver|قولفون نۇسقاسى|新疆作家哈文网
Powered by Discuz! X2.5(NurQut Team)© 2001-2011 Comsenz Inc. For www.xjzjxh.com
جوعارى جاق